Wararka24: Allaha u naxariistee Imaam Maxamed Yuusuf Cali, oo ka mid ahaa odayaasha dhaqanka Soomaaliyeed ee sida weyn looga yaqaanay doorkiisa nabadeynta iyo dib-u-heshiisiinta bulshada, ayaa ku geeriyooday dalka Hindiya, halkaas oo muddooyinkii dambe loogu qaaday daryeel caafimaad.
Geerida Imaamka ayaa murugo ku abuurtay bulshada Soomaaliyeed, iyadoo mas’uuliyiin iyo qeybaha kala duwan ee bulshada ay ka tacsiyeynayaan geerida marxuumka oo door muuqda ka soo qaatay arrimaha bulshada iyo xallinta khilaafaadka.
Madaxweynaha Jamhuuriyadda Federaalka Soomaaliya Xasan Sheekh Maxamuud ayaa tacsi u diray qoyska, ehelada iyo guud ahaan shacabka Soomaaliyeed, isaga oo ka hadlay kaalintii uu Imaam Maxamed Yuusuf Cali ku lahaa geeddi-socodkii nabadeynta iyo dib-u-heshiisiinta dalka.
Madaxweynaha ayaa ku tilmaamay marxuumka haldoor qaran oo muddo dheer ka shaqeynayay xoojinta wadajirka bulshada iyo ilaalinta midnimada ummadda Soomaaliyeed. Wuxuu xusay in dadaallada uu sameeyay Imaamka ay ka mid ahaayeen waxqabadyo muhiim ah oo lagu xasuusan doono.
Qoraal lagu baahiyay warbaahinta madaxtooyada ayaa lagu sheegay in Madaxweyne Xasan Sheekh Maxamuud uu Alle uga baryay marxuumka inuu hoygiisa ka yeelo Jannatul Firdowsa, isla markaana uu samir iyo iimaan ka siiyo qoyskiisa, eheladiisa iyo dhammaan shacabka Soomaaliyeed.
Imaam Maxamed Yuusuf Cali ayaa ka mid ahaa isimada iyo waxgaradka Soomaaliyeed ee muddo dheer ku howlanaa dadaallada lagu xoojinayo nabadda, wada noolaanshaha iyo xal u helidda khilaafaadka bulshada dhexdeeda ka jira.
Geeridiisa ayaa loo arkaa mid ay si weyn u dareemayaan qeybaha kala duwan ee bulshada Soomaaliyeed, maadaama uu caan ku ahaa kaalintiisa ku aaddan nabadeynta iyo mideynta bulshada.
