Wararka24: Wasiirka Gaashaandhigga Soomaaliya, Axmed Macallin Fiqi, ayaa jawaab ka bixiyay hadallo uu xalay jeediyay Madaxweynihii hore ee Soomaaliya Sheekh Shariif Sheekh Axmed, kuwaas oo uu ku dhaliilay dowladda federaalka.
Sheekh Shariif oo ka hadlay munaasabadda 1-da Luulyo ayaa sheegay in shacabka Soomaaliyeed ay xusayaan xorriyaddii la helay sanadkii 1960-kii, isaga oo tilmaamay in dalka uu wajahayo caqabado siyaasadeed iyo muranno la xiriira maamulka iyo xorriyadaha shacabka.
Madaxweynihii hore ayaa sidoo kale ku eedeeyay dowladda federaalka inay ku kacayso falal uu ku tilmaamay caburin siyaasadeed iyo faragelin lagu hayo maamul goboleedyada dalka.
Wasiir Axmed Macallin Fiqi ayaa dhankiisa sheegay in Sheekh Shariif uu si joogto ah u dhaliilo dowladda iyo madaxdeeda, isaga oo xusay in eedeymaha loo jeedinayo xukuumadda aysan ku saleysneyn xaqiiqooyin muuqda.
Fiqi ayaa sidoo kale sheegay in siyaasiyiinta mucaaradka looga baahan yahay inay doodahooda ku saleeyaan aragtiyo wax dhisaya oo gacan ka geysan kara xallinta khilaafaadka siyaasadeed ee jira.
Wasiirka Gaashaandhigga ayaa hadallo kulul u adeegsaday Sheekh Shariif, isaga oo sheegay in madaxweynihii hore uu ku jahwareersan yahay dhacdooyinkii la xiriiray dagaalkii Mirinaayo, isla markaana uu marar badan si adag u weeraro dowladda uu hoggaamiyo Madaxweyne Xasan Sheekh Maxamuud.
Hadalladan is dhaafsiga ah ayaa ku soo aadaya xilli uu sii xoogeysanayo muranka siyaasadeed ee u dhexeeya Dowladda Federaalka Soomaaliya iyo qaar kamid ah siyaasiyiinta mucaaradka, iyadoo weli la sugayo dadaallo lagu yareynayo ismari-waaga siyaasadeed ee dalka.
