Wararka24: Ra’iisul Wasaaraha Xukuumadda Federaalka Soomaaliya, Xamza Cabdi Barre, ayaa saaka jaam ku galay isgoyska Tarabuunka ee magaalada Muqdisho, kadib markii uu kasoo laabtay munaasabad uu xarigga kaga jarayay waddo laami ah oo laga hirgeliyay degmada Dayniile.
Ra’iisul Wasaaraha iyo kolonyadiisa ayaa muddo kooban ku hakaday ciriiriga gaadiidka ee ka jiray isgoyska, ka hor inta aysan sii wadan socdaalkooda.
Xamza Cabdi Barre oo ka hadlay dhacdadan ayaa sheegay inuu ku faraxsan yahay inuu si toos ah ula socdo xaaladda shacabka iyo ciriiriga ka jira waddooyinka caasimadda.
“Waxaa Ilaahey mahadiis ah inaan saaka soo maray Tarabuunka, iyada oo aan jid la ii xirin oo aan isa soo dhex soconay bulshadeenna. Waan ku faraxsanahay in Tarabuunka aan xoogaa taagnayn iyo meelo kale oo uu jaam ka jiray,” ayuu yiri Ra’iisul Wasaaruhu.
Wuxuu intaas ku daray inuu ku faraxsan yahay in madaxda dowladda ay bulshada la wadaagaan nolol maalmeedkooda, isla markaana ay si dhow u arkaan baahiyaha iyo duruufaha ay wajahaan shacabka Muqdisho.
Ra’iisul Wasaaruhu wuxuu sidoo kale xusay in safarkiisa uu ku tegay degmada Dayniile uu u dhacay si caadi ah, isaga oo sheegay inaan la xirin waddooyinka, isla markaana ay si nabad ah u gaareen goobtii munaasabadda ay uga qaybgalayeen isaga iyo Guddoomiyaha Gobolka Banaadir, Xasan Maxamed Xuseen (Muungaab).
Dhankiisa, Xamza Cabdi Barre ayaa bogaadiyay xaaladda amni ee Muqdisho, isaga oo sheegay in magaalada ay ka muuqdaan isbeddello la xiriira xasilloonida iyo dhaq-dhaqaaqa bulshada.
“Magaaladan waa nabad, looma baahna hub waa weyn, nabad ayay ku naalooneysaa magaaladaan, shacabkeedana ay ku noolaanayaan,” ayuu yiri Ra’iisul Wasaaraha Soomaaliya.
