Wararka24: Madaxweynaha Somaliland, Cabdiraxmaan Maxamed Cabdillaahi Cirro, ayaa magaalada Hargeysa ku qaabilay ku-simaha safiirka Mareykanka ee Soomaaliya, Justin Davis, sida lagu sheegay war-saxaafadeed kasoo baxay Madaxtooyada Somaliland.
Kulanka ayaa diiradda lagu saaray xoojinta xiriirka iyo iskaashiga dhinacyada amniga gobolka, amniga marin-biyoodka Badda Cas, maalgashiga, ganacsiga, kaabeyaasha dhaqaalaha, tamarta iyo arrimaha dimuqraadiyadda.
Madaxtooyada Somaliland ayaa sheegtay in Madaxweyne Cirro uu wafdiga Mareykanka uga mahadceliyay xiisaha sii kordhaya ee Washington ay u muujinayso Somaliland. Waxa uu sidoo kale soo hadal qaaday dadaallo siyaasadeed iyo hindiseyaal sharci oo ka socda goleyaasha Mareykanka kuwaas oo la xiriira Somaliland.
Dhankiisa, Justin Davis ayaa la sheegay inuu bogaadiyay nabadda, xasilloonida iyo nidaamka dimuqraadiga ah ee ka jira Somaliland. Wuxuu sidoo kale muujiyay diyaar u ahaanshaha Mareykanka ee xoojinta iskaashiga dhinacyada amniga, difaaca, amniga badda, ganacsiga iyo maalgashiga.
Kulankan ayaa kusoo aadaya maalmo kadib markii warbixin loo gudbiyay Kongareeska Mareykanka ay sheegtay in Washington ay qiimeyneyso fursado lagu ballaarin karo wada-shaqeynta ay la leedahay Somaliland, gaar ahaan dhinacyada amniga, dekedaha, ganacsiga iyo kaabeyaasha dhaqaalaha.
Si kastaba ha ahaatee, warbixintaasi waxay si cad u adkaysay in siyaasadda rasmiga ah ee Mareykanka ay weli tahay taageeridda midnimada iyo wadajirka dhuleed ee Somaaliya. Dowladda Mareykanka ayaa Somaliland ula macaamisha maamul ka tirsan Soomaaliya, iyadoo aan wax isbeddel ah lagu sameyn mowqifkeeda ku aaddan aqoonsiga Soomaaliya mideysan.
Somaliland ayaa ku dhawaaqday inay ka go’day Soomaaliya sanadkii 1991, balse wali ma helin aqoonsi caalami ah oo ballaaran. Dowladda Federaalka Soomaaliya ayaa marar badan ku celcelisay in xiriir kasta oo rasmi ah oo lala yeesho Somaliland uu maro Muqdisho.
Kulanka Hargeysa ka dhacay ayaa mar kale muujinaya muhiimadda sii kordheysa ee Somaliland u leedahay danaha amni iyo dhaqaale ee gobolka, iyadoo Mareykanku uu sii wado xiriirka iyo wada-shaqeynta dhinacyada kala duwan, isaga oo weli taageeraya midnimada Soomaaliya.
