Laamaha ammaanka ee Dowladda Federaalka ayaa bilaabay baaritaanka weerarkii socday saacado badan ee ay Talaadadii kooxda Al-Shabaab ka fuliyeen Hotel Qaahira ee magaalada Beledweyne.
Wararka ayaa sheegaya in baareyaal ka socda Dowladda Federaalka ay ku wajahan yihiin Beledweyne, iyagoo la shaqeynaya laamaha ammaanka ee halkaas ku sugan. Hay’adda Nabad Sugidda & Sirdoonka Qaranka (NISA) ayaa hoggaamin doonta baaritaankan, iyadoo diiradda saareysa:
- Sidii gaarigii iyo mooto bajaajtii qaraxda lagu fuliyay ay ku dhaafeen kontoroolka galbeed ee magaalada
- In qaraxyadaasi lagu diyaariyay meel ka baxsan Beledweyne
- Suurtagalnimada in dad gudaha magaalada ah ay fududeeyeen weerarka
Waxaa sidoo kale la baarayaa tuhun ah in qaar ka mid ah dableydii weerarka fulisay ay baxsadeen, maadaama wali lama soo bandhigin meydadka lixda nin ee weerarka qaaday, taasoo shaki dhalisay.
Xildhibaanada iyo Beesha galbeedka Beledweyne ayaa Dowladda Federaalka baaritaan ka dalbaday
Guddoomiyaha Degmada Beledweyne, Cumar Cismaan Calasow, ayaa sheegay in lix dagaalyahan weerarka ka dambeeyeen, labo la toogtay, afartana ay is qarxiyeen. Wararka qaarse waxay tilmaamayaan in rag hubeysan oo dibadda ka yimid ay weerareen ciidamadii ku hareereysnaa hotelka, taasoo sii xoojisay shakiga ah in dableydaasi si ula kac ah loo fakiyay.
Beesha galbeedka Beledweyne, oo dadkeeda lagu beegsaday weerarka, ayaa codsatay in baaritaan degdeg ah lagu sameeyo. Xildhibaan Daahir Amiin Jeesow, oo ka tirsan xubnaha beesha ee Baarlamaanka Federaalka, ayaa si adag u cambaareeyay weerarka, isagoo sheegay:
“Waa lama huraan in la ogaado cidda fududeysay weerarka, oo ay cadaalad heshana dadkii waxyeelladu ka soo gaartay.”
Beeshaasi ayaa horey ugu diyaargaroobeysay ka qeybgalka wejiga labaad ee hawlgalka dib-u-xoreynta dalka, kadib markii Dowladda Federaalka ay xoojisay dagaalka lagaga saarayo Al-Shabaab deegaannada HirShabelle.
Al-Shabaab oo sheegtay masuuliyadda weerarka
Kooxda Al-Shabaab ayaa sheegatay masuuliyadda weerarka, iyagoo ku doodaya in hotelkaasi uu ahaa goob lagu abaabulayay howlgallo ka dhan ah iyaga.
Xildhibaan Cabdiraxmaan Cabdishakuur Warsame ayaa dhankiisa cambaareeyay weerarka, isagoo xusay in:
“Al-Shabaab waa cadowga dowladnimada iyo jiritaanka ummadda Soomaaliyeed. Dadka reer Beledweyne waxay rumeysan yihiin in kooxdaasi aysan halkaas soo gaari lahayn haddii aysan jirin dad gudaha ah oo gacan siiyay.”
Weerarkan ayaa noqday kii ugu waqtiga dheeraa ee kooxdaasi ka fuliyaan Beledweyne, taasoo muujisay in Al-Shabaab ay culeys saarayaan HirShabelle, oo ah xuddunta wejiga labaad ee hawlgalka dib-u-xoreynta dalka.
📌 Wararka24 – Xog rasmi ah & Faahfaahin degdeg ah
