Wararka24: Qarax culus oo miino ahaa ayaa maanta lala beegsaday ciidamo ka tirsan ciidanka Kenya meel u dhow xadka ay wadaagaan Soomaaliya iyo Kenya, waxaana weerarkaasi uu sababay khasaare dhimasho iyo dhaawac leh.
Qaraxa ayaa ka dhacay duleedka Dadaab, waxaana lala eegtay kolonyo ay wateen ciidamada Kenya, sida ay xaqiijiyeen ilo deegaanka ah.
Wararka hordhaca ah ayaa sheegaya in gebi ahaan uu burburay gaari ay saarnaayeen ciidamada Kenya, kadib markii uu haleelay qaraxa miinada ahaa oo lagu aasay waddada.
Inta la xaqiijiyay waxaa weerarka ku dhintay ugu yaraan afar askari oo Kenyan ah, oo uu ku jiro sarkaal sare, halka ay ku dhaawacmeen 11 kale oo kamid ahaa ciidamadii saarnaa gaariga la qarxiyay.
Maydadka askarta iyo dhaawacyada ayaa goobta looga qaaday gaadiid ciidan, waxaana loo daabulay qaybo kamid ah gobolka Waqooyi Bari ee Kenya si loogu sameeyo gurmad caafimaad iyo baaritaanno kale.
Al-Shabaab ayaa sheegatay mas’uuliyadda weerarkan, waxayna bayaan ay soo saartay ku sheegtay in howlgalka uu u dhacay sidii ay qorsheeyeen.
Xaaladda goobta uu qaraxu ka dhacay ayaa weli kacsan, waxaana halkaasi gaaray ciidamo dheeraad ah oo ka tirsan kuwa Kenya, kuwaas oo billaabay howlgallo amni iyo baaritaanno la xiriira weerarka.
Weerarkan ayaa kusoo aadaya xilli ciidamada Kenya ay kordhiyeen roondooyinka amniga ee ka socda deegaannada ku dhow xadka Soomaaliya, si looga hortago weerarro ay fuliyaan maleeshiyaadka Al-Shabaab.
Kooxda Al-Shabaab ayaa marar badan weerarro qaraxyo iyo weeraro ku dhufo oo ka dhaqaaq ah ka fulisay gobolka Waqooyi Bari ee Kenya iyo deegaannada ku dhow xadka Soomaaliya.
DAAWO
