Wararka24: Taliyaha Qeybta Guud ee Booliska Gobolka Banaadir, Mahdi Cumar Mumin, ayaa sheegay in ciidamada ammaanka ay diyaar u yihiin inay tallaabo ka qaadaan shaqsiyaad lagu tuhunsan yahay inay hub ku dhex wataan bannaanbaxyada ka dhacaya magaalada Muqdisho.
Taliyaha ayaa sheegay in la uruurinayo xogta dadka lagu eedeeynayo inay hub la joogaan dibadbaxyada, isagoo xusay in la hayo macluumaad ay ka mid yihiin magacyo, sawirro iyo xog kale oo aqoonsi ah.
“Dadka hubeysan iyo cid kasta oo hoy siisa ama la shaqeysa waa lala xisaabtami doonaa. Waxaan haynaa magacyadiinna, sawirradiinna iyo xogtiinna, qof walbana wuxuu leeyahay diiwaanka NIRA,” ayuu yiri taliyaha.
Hadalka kasoo baxay Booliska Banaadir ayaa kusoo aadaya xilli ay sii kordhayaan xiisadaha siyaasadeed ee ka taagan caasimadda, iyadoo baraha bulshada lagu baahiyay muuqaallo muujinaya dad ka qeyb-galaya dibadbaxyo iyo ilaalo la socota qaar kamid ah hoggaamiyeyaasha mucaaradka.
Taliyaha ayaa sidoo kale shacabka uga digay ka qeybgalka bannaanbaxyo uu ku tilmaamay kuwo halis gelin kara amniga iyo kala dambeynta magaalada, isaga oo ku baaqay in la ilaaliyo nabadda iyo xasilloonida.
Dhanka kale, Dowladda Federaalka Soomaaliya ayaa horay u sheegtay inay oggoshahay bannaanbaxyo nabadeed oo waafaqsan sharciga, balse ay u asteeysay goob cayiman oo lagu qabto mudaharaadyada mucaaradka.
Dowladdu waxay sheegtay in bannaanbaxyo ka dhaca meelo kala duwan ay saameyn ku yeelan karaan amniga guud, isu socodka shacabka iyo adeegyada muhiimka ah ee magaalada.
Arrintan ayaa kusoo beegmaysa xilli ay weli taagan yihiin khilaafaad siyaasadeed oo ku saabsan hannaanka doorashooyinka iyo xaaladda kala guurka ee dalka.
