Wararka24: Sacuudi Carabiya ayaa ku dhawaaqday in maanta oo Axad ah la raadin doono bisha Dul-Xijjah 1447 Hijriyada, sida lagu sheegay bayaan kasoo baxay Maxkamadda Sare ee Boqortooyada.
Maxkamadda Sare ayaa sheegtay in shacabka Sacuudiga looga baahan yahay inay la socdaan curashada bisha, si loo xaqiijiyo bilowga bisha Dul-Xijjah oo muhiimad gaar ah u leh Muslimiinta caalamka.
Bayaanka ayaa lagu xusay in xaqiijinta bisha ay saldhig u tahay jadwalka gudashada waajibaadka xajka, gaar ahaan maalinta Carafo iyo dabaal-degga Ciidul-Adxaa.
Sidoo kale, Maxkamadda Sare ayaa ugu baaqday cid kasta oo aragta bisha cusub inay xogtaas gaarsiiso maxkamadaha iyo hay’adaha ay khuseyso, si si rasmi ah loo diiwaangeliyo aragtida bisha.
Bisha Dul-Xijjah ayaa kamid ah bilaha ugu fadliga badan sanadka Islaamka, waxaana ku jira acmaalo cibaado oo waaweyn sida gudashada xajka iyo soonka tobanka maalmood ee ugu horreeya bisha.
Maalinta sagaalaad ee Dul-Xijjah, oo loo yaqaan Maalinta Carafo, ayaa ah maalin qiimo weyn leh, iyadoo malaayiin Muslimiin ah ay isugu tagaan deegaanka Carafo si ay u gutaan rukniga ugu weyn ee xajka.
Sidoo kale, maalinta xigta ee 10-ka Dul-Xijjah ayaa ah maalinta koowaad ee Ciidul-Adxaa, taas oo si weyn looga xuso dunida Islaamka.
