Wararka24: Dowladda Ruushka ayaa maanta Soomaaliya ku wareejisay deeq gargaar bani’aadannimo ah oo loogu talagalay dadka ay saameeyeen abaaraha iyo xaaladaha nololeed ee adag ee ka jira qaybo kamid ah dalka.
Deeqdan ayaa lagu wareejiyay mas’uuliyiin ka tirsan Dowladda Federaalka Soomaaliya oo ku sugnaa garoonka Diyaaradaha Aadan Cadde, halkaas oo ay kasoo degtay diyaaraddii sidday gargaarka.
Safiirka Ruushka ee Soomaaliya, Mikhail Golovanov ayaa si rasmi ah dowladda Soomaaliya ugu wareejiyay shixnadda gargaarka oo ka kooban 25 tan oo raashin ah, isaga oo ay dhinac taagnaayeen qunsulka Ruushka iyo saraakiil kale oo ka socotay dowladda Moscow.
Mas’uuliyiinta Soomaaliya ee goobta joogay waxaa kamid ahaa wasiirka warfaafinta, guddoomiyaha hay’adda SODMA iyo xubno kale oo ka socday hay’adaha dowladda ee qaabilsan arrimaha gurmadka iyo gargaarka.
Dowladda Soomaaliya ayaa sheegtay in deeqdan ay qeyb ka tahay taageerada caalamiga ah ee lagu garab istaagayo shacabka Soomaaliyeed ee wajahaya xaaladaha bani’aadannimo, xilli qaybo kamid ah dalka ay weli saameyn ku leeyihiin abaarta iyo barakaca.
Sidoo kale, dowladda federaalka ayaa dalalka saaxiibada la ah Soomaaliya ugu baaqday inay kordhiyaan taageerada bani’aadannimo si wax looga qabto baahiyaha sii kordhaya ee shacabka nugul, gaar ahaan dadka ku nool deegaanada ay abaaruhu saameeyeen.
DAAWO
