Wararka24: Wasiirka Arrimaha Gudaha, Dowladaha Hoose iyo Dib-U-Heshiisiinta Koonfur Galbeed Soomaaliya, Maxamed Isaaq Ismaan Fanax ayaa wareegto uu soo saaray ku magacaabay maamul cusub oo hoggaamiya magaalada Baydhabo, xilli ay sii xoogeysanayaan dhaq-dhaqaaqyada siyaasadeed ee la xiriira doorashooyinka maamulkaas.
Wareegtada ayaa lagu magacaabay Cabdiraxmaan Ibraahim Aadan Sate inuu noqdo guddoomiyaha degmada Baydhabo ahna duqa magaalada, iyadoo si rasmi ah loo dhaqan geliyay magacaabistan laga bilaabo 25-ka April 2026.
Wasiirka ayaa sidoo kale faray maamulka gobolka Baay iyo laamaha amniga inay si buuxda ula shaqeeyaan mas’uulka cusub, si loo dardar geliyo howlaha maamulka iyo sugidda amniga inta lagu jiro marxaladdan xasaasiga ah.
Magacaabistan ayaa timid kadib markii xilka laga qaaday guddoomiyihii hore Cabdullahi Watiin, kaas oo dhawaan lagu sameeyay hub ka dhigis, iyadoo lagu tuhmay inuu xiriir la lahaa dhinacyada mucaaradka ee ka soo horjeeda isbeddellada ka socda maamulka Koonfur Galbeed.
Sidoo kale, wararka ayaa tilmaamaya in tallaabooyinkan ay qayb ka yihiin dadaallo ay dowladda ku dooneyso inay ku xakameyso xaaladda kacsan ee ka taagan Baydhabo, gaar ahaan kadib dhaq-dhaqaaqyo ciidan oo ay sameeyeen ciidamada taabacsanaa madaxweynihii hore Cabdicasiis Laftagareen.
Xiisaddan ayaa kusoo beegmeysa xilli la filayo in maamulka Koonfur Galbeed uu galo doorashooyin cusub, iyadoo weli la dareemayo khilaaf siyaasadeed oo u dhexeeya dowladda dhexe iyo qaar ka mid ah dhinacyada deegaanka.
Mas’uuliyiinta ayaa rajo ka muujiyay in magacaabista cusub ay gacan ka geysan doonto dejinta xaaladda iyo dardargelinta howlaha maamulka magaalada
Wareegtada
