Wararka24: Xukuumadda Somaliland ayaa sheegtay in tallaabadii ay Israa’iil ku magacawday safiir u qaabilsan Somaliland ay fure u noqon karto aqoonsi caalami ah oo ay dalal kale siiyaan maamulkaasi.
Wasiirka Warfaafinta Somaliland, Barkhad Jaamac Batuun, ayaa sheegay in arrintan ay tahay guul taariikhi ah oo u soo hoyatay shacabka Somaliland, islamarkaana aan dib loo celin karin.
Wuxuu tilmaamay in maalmaha soo socda la filayo in dalal kale ay ku daydaan tallaabada Israa’iil, isla markaana ay aqoonsadaan Somaliland, isagoo arrintan ku sifeeyay “tusbax furmay” iyo “tareen dhaqaaqay”.
Dhanka kale, Dowladda Federaalka Soomaaliya ayaa si adag uga hortimid tallaabadan, iyadoo ku tilmaantay xadgudub ka dhan ah madax-bannaanida iyo wadajirka dhuleed ee dalka.
Warsaxaafadeed ay soo saartay Wasaaradda Arrimaha Dibadda Soomaaliya ayaa lagu sheegay in magacaabista safiirka Israa’iil ay jebinayso shuruucda caalamiga ah, islamarkaana aysan wax sharci ah ku fadhin.
Somaliland ayaa muddo ka badan 30 sano waday dadaallo ay ku raadinayso aqoonsi caalami ah, balse ilaa hadda ma helin aqoonsi rasmi ah oo ay ka hesho beesha caalamka.
Xiisaddan diblomaasiyadeed ayaa imaneysa xilli uu sii xoogeysanayo khilaafka u dhexeeya Muqdisho iyo Hargeysa ee la xiriira arrimaha madax-bannaanida iyo mustaqbalka siyaasadeed ee dalka.
