Wararka24: Taliska Ciidamada Mareykanka ee Afrika AFRICOM ayaa shaaciyay in uusan qorsheynaynin inuu saldhigyo milatari ka sameysto Geeska Afrika, gaar ahaan magaalada Berbera, inkastoo maamulka Somaliland uu hore u muujiyay diyaar u ahaanshihiisa.
Hadalkan ayaa imanaya xilli ay sare u kacday xiisadda ku saabsan marin-biyoodka Bab el-Mandab, kadib carqalado ka dhacay marinka Hormuz oo saameyn ku yeeshay isu socodka shidaalka iyo ganacsiga caalamiga ah.
Saraakiil Mareykan ah oo uu ku jiro Taliyaha AFRICOM, Jeneraal Dagvin Anderson, ayaa booqasho ku tegay deegaano ka tirsan Somaliland, halkaas oo lagu soo bandhigay awoodda dekedda Berbera iyo garoonka diyaaradaha oo leh muhiimad istaraatiiji ah.
Si kastaba, Mareykanka ayaa si cad u sheegay in uusan daneynaynin inuu halkaas ka sameysto saldhig milatari, isagoo tilmaamay in qorshayaasha noocaas ah aysan la jaanqaadeyn siyaasadda amni ee hadda lagu dhaqmo.
Dhanka kale, Somaliland ayaa muddo dheer waday dadaallo ay ku doonayso inay hesho xiriir amni oo gaar ah oo ay la yeelato Washington, iyadoo Berbera u soo bandhigtay xarun muhiim u noqon karta hawlgallada cirka iyo badda.
Hase yeeshee, US Department of State ayaa mar kale xaqiijisay in Mareykanku uu ixtiraamayo midnimada iyo wadajirka dhuleed ee Soomaaliya, taas oo ay ku jirto Somaliland.
Khubaro caalami ah ayaa ka digay in tallaabo kasta oo Mareykanku ku aqoonsado ama ku taageero Somaliland ay dhaawici karto xiriirka uu la leeyahay dalalka Carabta sida Sacuudiga iyo Masar.
Ugu dambeyn, hadalkan AFRICOM ayaa u muuqda mid soo afjaraya rajadii laga qabay in Mareykanku saldhig milatari ka sameysto Berbera, iyadoo arrintan ay ahayd mid siyaasiyan xasaasi ah muddooyinkii u dambeeyay.
