Wararka24: Wasiirka Arrimaha Gudaha Puntland Cabdi Xirsi Cali ayaa eedeymo culus u jeediyay Dowladda Federaalka Soomaaliya, isagoo sheegay inay waddo waxa uu ku tilmaamay duullaan siyaasadeed iyo mid amni oo ka dhan ah maamulka Puntland. Hadalkan ayaa kusoo aadaya xilli uu sii xoogeysanayo khilaafka u dhexeeya labada dhinac.
Wasiirka ayaa sheegay in Puntland ay si dhow ula socoto xaaladda guud ee dalka, gaar ahaan dhaqdhaqaaqyada siyaasadeed iyo kuwa amni. Wuxuu xusay in maamulkiisu uu qaaday tallaabooyin uu ku difaacayo dhulkiisa iyo nidaamkiisa dowladeed.
Cabdi Xirsi Cali ayaa tilmaamay in Puntland ay mar walba u taagneyd midnimada ummadda Soomaaliyeed iyo iskaashiga heer qaran. Si kastaba, wuxuu sheegay in rajadii laga qabay dowladda federaalka aysan rumoobin, isagoo eedda u weyn dusha u saaray Madaxweyne Xasan Sheekh Maxamuud.
Wuxuu intaas ku daray in Puntland ay muddo ka badan hal sano ku jirtay xaalado adag oo isugu jira dagaal iyo cadaadis siyaasadeed, isla markaana dowladda federaalka aysan bixin taageeradii laga sugayay. Arrintan ayuu ku tilmaamay mid saameyn ku yeelatay xasilloonida maamulka.
Sidoo kale, wasiirka ayaa sheegay in ay jiraan faragelin lagu wiiqayo nidaamka federaalka, taas oo uu xusay inay si gaar ah u saameyneyso wada shaqeynta dowlad goboleedyada. Wuxuu caddeeyay in Puntland ay qaadday jidka isku filnaanshaha.
Hadalka wasiirka ayaa kusoo aadaya xilli ay sii kordhayaan xiisadaha siyaasadeed ee u dhexeeya dowladda federaalka iyo qaar ka mid ah dowlad goboleedyada. Dowladda Federaalka ayaan weli ka hadlin eedeymaha loo jeediyay.
