Wararka24: Ciidanka gaarka ah ee Danab ayaa howlgal qorsheysan ka fuliyay deegaanka Far Shabeel oo hoostaga degmada Jilib ee gobolka Jubbada Dhexe.
Saraakiisha hoggaaminaysay howlgalka ayaa sheegay in weerarka si xeeladaysan loo abaabulay, isla markaana lagu beegsaday xubno ka tirsan Al Shabaab oo ku sugnaa halkaasi.
Waxay tilmaameen in ciidamadu ay gaareen bartilmaameedyadii loo qorsheeyay, islamarkaana ay burburiyeen fariisimo ay kooxdaasi ku lahayd deegaanka.
Inkasta oo aan si rasmi ah loo shaacin khasaaraha, saraakiishu waxay sheegeen in howlgalka uu guul ku soo dhammaaday.
Howlgalkan ayaa qeyb ka ah dadaallada lagu wiiqayo awoodda Al Shabaab ee gobolka Jubbada Dhexe oo ah meel muhiim u ah dhaq dhaqaaqooda.
Dhanka kale, Ciidanka Xoogga Dalka Soomaaliyeed ayaa howlgal miino baaris ah ka fuliyay deegaanka Gololey ee gobolka Shabeellada Dhexe.
Ciidamada ayaa ku guuleystay inay ka saaraan miinooyin lagu aasay waddooyinka, kuwaas oo halis ku ahaa shacabka iyo gaadiidka.
