Wararka24: Falanqayn ay sameysay Reuters ayaa muujisay in dagaalka ka socda Bariga Dhexe iyo xiritaanka Marinka Hormuz ay si kala duwan u saameeyeen dhaqaalaha dalalka shidaalka soo saara.
Warbixinta ayaa sheegtay in dalalka Iran, Cumaan iyo Sacuudiga ay ka faa’iideen kororka weyn ee qiimaha shidaalka, halka dalal kale ay la kulmeen khasaare dhaqaale oo baahsan.
Kororka qiimaha saliidda oo gaaray ilaa 60% bishii March ayaa sare u qaaday dakhliga dalalka qaarkood, gaar ahaan kuwa leh marinno kale oo ay shidaalka ku dhoofiyaan.
Iran ayaa la sheegay in dakhligeedu kordhay boqolkiiba 37, halka Cumaan uu kordhay 26%, Sacuudigana uu helay koror dhan 4.3%.
Dhanka kale, dalalka sida Ciraaq iyo Kuwait ayaa la kulmay hoos u dhac weyn, iyadoo dakhliga Ciraaq uu hoos u dhacay 76%, halka kan Kuwait uu hoos u dhacay 73%.
Sababta ugu weyn ayaa lagu sheegay in dalalkan aysan lahayn marinno kale oo ay kaga baxaan Marinka Hormuz, taas oo si toos ah u hakisay dhoofintooda.
Sidoo kale, Imaaraadka Carabta ayaa la sheegay in uu si qayb ahaan uga badbaaday saameynta, inkastoo dakhliga uu hoos u dhacay.
Falanqaynta ayaa xustay in juqraafiyadda iyo kaabeyaasha dhoofinta ay door weyn ka ciyaareen cidda faa’iiday iyo cidda khasaaray.
