Wararka24: Guddiga Madaxa bannaan ee Doorashooyinka iyo Soohdimaha Qaranka ayaa si rasmi ah u shaaciyay xilliga ay dhaceyso doorashada goleyaasha deegaanka iyo Golaha Wakiillada ee Koonfur Galbeed.
Guddoomiyaha guddiga Cabdikariim Axmed Xasan ayaa sheegay in 28-ka bishan April loo qorsheeyay in deegaannada Koonfur Galbeed ay ka dhacdo doorasho qof iyo cod ah.
Wuxuu xusay in guddigu uu sameeyay diyaar garow ballaaran oo ay ku jiraan goobaha codbixinta, agabka doorashada iyo shaqaalaha fulinaya howlaha.
Sidoo kale, guddiga ayaa kordhiyay waqtiga diiwaangelinta codbixiyeyaasha si fursad loo siiyo dadka aan weli is diiwaangelin.
Guddoomiyaha ayaa sheegay in doorashadan ay noqon doonto mid ay si toos ah dadweynuhu ugu codeynayaan wakiilladooda.
Shaacinta jadwalkan ayaa imaanaysa kadib kulamo Baydhabo ku dhex maray guddiga doorashooyinka iyo hoggaanka kumeel gaarka ah ee maamulka Koonfur Galbeed.
Doorashadan ayaa lagu tilmaamay mid muhiim u ah horumarinta dimuqraadiyadda dalka iyo hirgelinta nidaamka doorasho qof iyo cod ah.
