Wararka24: Madaxweynaha Soomaaliya Xasan Sheekh Maxamuud ayaa lagu wadaa inuu maalmaha soo socda booqasho ku tago magaalada Baydhaba, kadib markii ay ciidamada Dowladda Federaalka la wareegeen gacan ku haynta magaalada.
Ujeedka safarka madaxweynaha ayaa la xiriira kormeerka xaaladda magaalada iyo isbeddelka siyaasadeed ee ka dhacay Koonfur Galbeed, sida ay sheegayaan warar la helayo.
Wararka ayaa tilmaamaya in madaxweynuhu uu la kulmi doono siyaasiyiin iyo qaybaha kala duwan ee bulshada, si looga arrinsado marxaladda kala guurka ah iyo qorshaha doorasho qof iyo cod ah.
Baydhaba waxaa horey ugu sugan Guddoomiyaha Golaha Shacabka Sheekh Aadan Maxamed Nuur (Aadan Madoobe), oo kulamo la xiriira xaaladda ka wada magaalada.
Xaaladda magaalada ayaa haatan degan, kadib howlgal ay dowladda federaalka ku qaadday oo si buuxda loogu la wareegay xarunta maamulka Koonfur Galbeed.
Isbeddelkan ayaa sababay in si degdeg ah ay isu beddesho jihada siyaasadeed ee maamulka, iyadoo ay socdaan dadaallo lagu dhisayo maamul cusub.
Dhanka kale, Cabdicasiis Lafta-gareen ayaa la sheegay inuu u ambabaxay dalka Kenya, isagoo horay u magacaabay ku-simaha madaxweynaha Koonfur Galbeed.
