Wararka24: Wasiirrada arrimaha dibadda ee dalalka Carabta ayaa isku raacay in diblomaasiga Masar Nabil Fahmi loo magacaabo xoghayaha guud ee cusub ee Jaamacadda Carabta.
Go’aanka ayaa lagu gaaray shir ay wasiirradu yeesheen, waxaana la filayaa in Fahmi uu xilka si rasmi ah ula wareego bisha July, marka uu dhammaado muddada Axmed Aboul Gheit oo xilka hayay tan iyo 2016.
Magacaabistan ayaa sii xoojinaysa dhaqanka ah in Masar ay hayso hoggaanka ugu sarreeya ee Jaamacadda Carabta, maadaama inta badan xilkan ay qabtaan masuuliyiin u dhashay dalkaas.
Nabil Fahmi ayaa hore u soo noqday wasiirka arrimaha dibadda ee Masar intii u dhaxaysay 2013 ilaa 2014, sidoo kale wuxuu safiir uga soo noqday Mareykanka iyo Japan.
Wuxuu sidoo kale door muhiim ah ka qaatay dhinacyada tacliinta iyo siyaasadda arrimaha dibadda, isagoo ka mid ahaa aas aasayaasha xarun waxbarasho oo ku taal Qaahira.
Jaamacadda Carabta oo la aasaasay 1945 ayaa ka kooban 22 dal, waxayna door weyn ka ciyaartaa iskaashiga siyaasadeed ee dunida Carabta.
Fahmi ayaa xilka la wareegaya xilli gobolka uu wajahayo caqabado badan oo ay ka mid yihiin colaadaha iyo khilaafaadka sii kordhaya ee dalalka Carabta.
