Wararka24: Ciidamada Itoobiya ee ku sugan Baydhaba ayaa la sheegay inay u sheegeen madaxweynaha Koonfur Galbeed Cabdicasiis Xasan Maxamed Lafta-gareen inaanay ka difaaci karin ciidamada Dowladda Federaalka haddii ay magaalada galaan.
Ilo xog ogaal ah ayaa tilmaamay in saraakiisha Itoobiya ay si cad ugu wargeliyeen Lafta-gareen in aysan ku lug yeelan doonin iska horimaad toos ah oo ay la galaan ciidamada federaalka.
Go’aankan ayaa imanaya xilli ciidamada Dowladda Federaalka ay ku sii siqayaan duleedka Baydhaba, kadib dagaallo ka dhacay deegaanka Daynuunaay oo qiyaastii 18 kiiloomitir u jira magaalada.
Wararka ayaa sheegaya in Addis Ababa ay hadda diiradda saareyso sidii xal looga heli lahaa xaaladda cakiran, halkii ay ka geli lahayd dagaal sababi kara cawaaqib diblomaasiyadeed.
Ciidamada Itoobiya ayaa weli ku sugan gudaha iyo hareeraha Baydhaba, iyagoo qayb ka ah howlgalka AUSSOM, inkastoo joogitaankooda uu yahay mid xasaasi ah.
Xaaladdan ayaa kusoo aadaysa xilli uu sii xoogeysanayo khilaafka u dhexeeya Dowladda Federaalka Soomaaliya iyo maamulka Koonfur Galbeed, gaar ahaan arrimaha doorashooyinka.
Wararka kale ayaa sheegaya in ciidamada dowladda ay dhaqaaqyo hor leh ka bilaabeen waddada aada Baydhaba, taas oo sare u qaadaysa cabsi laga qabo dagaal ka dhaca magaalada.
Xiisadda ayaa weli taagan, iyadoo indhaha lagu hayo tallaabada xigta ee labada dhinac.
