Wararka24: Ciidanka Ilaalada Kacaanka Islaamiga ah ee Iiraan IRGC ayaa soo saaray digniin adag oo ay ku sheegeen inay bartilmaameedsan doonaan jaamacadaha Maraykanka iyo Israa’iil ee ku yaalla Bariga Dhexe.
Bayaanka IRGC ayaa yimid kadib weerar lagu qaaday Jaamacadda Sayniska iyo Tiknoolajiyada ee magaalada Tehran, kaas oo ay Iiraan ku eedeysay Israa’iil.
Hay’adda ayaa sheegtay in jaamacadaha la xiriira Maraykanka iyo Israa’iil loo aqoonsan doono bartilmaameedyo sharci ah ilaa laga aarguto weerarrada lagu qaaday xarumaha cilmi baarista ee dalkaas.
IRGC ayaa sidoo kale ku boorisay shaqaalaha, macallimiinta iyo ardayda jaamacadahaas inay ka fogaadaan goobahaasi, iyadoo ku talisay in ugu yaraan hal kiiloomitir laga durko si loo ilaaliyo badqabka.
Bayaanka ayaa intaas ku daray in Maraykanka uu haysto fursad uu ku cambaareeyo weerarrada lagu qaaday jaamacadaha Iiraan si looga hortago tallaabooyin aargoosi ah.
Waxaa sidoo kale la sheegay in IRGC ay u qabatay Maraykanka waqti kama dambeys ah oo ku eg 30ka Maarso si uu uga jawaabo arrintan.
Dhanka kale, hay’adaha ammaanka Israa’iil ayaa sare u qaaday feejignaanta, iyagoo ka cabsi qaba weerarro suurtagal ah oo laga yaabo inay ka yimaadaan kooxo ay Iiraan taageerto.
Xiisadda u dhexeysa Iiraan iyo Israa’iil ayaa sii xoogeysaneysa, iyadoo Maraykanku si cad u taageerayo Israa’iil, taas oo kordhineysa halista isku dhac ballaaran oo ka dhaca Bariga Dhexe.
