Wararka24: Ciidamada Ilaalada Kacaanka Iiraan ayaa sheegay inay soo rideen diyaarad nooca aan duuliyaha lahayn ah oo dul mareysay hawada magaalada Tehran, xilli xiisadda gobolka ay sii kacsan tahay.
Sida ay baahisay wakaaladda wararka ee Mizan, ciidamada ayaa adeegsaday nidaamyada difaaca cirka si ay u soo ridaan diyaaradda, taas oo la sheegay inay waday hawlo la xiriira sirdoon.
Wararka ayaa tilmaamaya in diyaaraddaasi ay ka mid ahayd nooca Hermes, oo inta badan loo adeegsado uruurinta xogta iyo kormeerka hawada, iyadoo noocyo ka mid ah ay sidoo kale qaadi karaan qalab kale oo milatari.
Iiraan ayaa sheegtay in tan iyo markii uu dagaalku billowday 28-kii Febraayo ay burburisay tiro badan oo diyaarado aan duuliye lahayn ah, kuwaas oo ay ku tilmaantay kuwo si joogto ah u galay hawadeeda.
Si kastaba, ma jiraan weli warar madax bannaan oo xaqiijinaya faahfaahinta dhacdadan, iyadoo xaaladda amni ee gobolka ay weli tahay mid kacsan.
