Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud iyo wafdi uu hoggaaminayo ayaa maanta ka dhoofay garoonka diyaaradaha ee Muqdisho, isaga oo kusii jeeda dalka Jabuuti.
Safarkan ayaa yimid kadib markii madaxweynuhu uu casuumaad rasmi ah ka helay dhiggiisa dalka Jabuuti Ismaaciil Cumar Geelle, iyadoo la filayo in labada hoggaamiye ay yeeshaan wada-hadallo ku saabsan arrimo dhowr ah oo muhiim u ah labada dal.
Ilo wareedyo ayaa sheegay in kulamada labada madaxweyne ay diiradda saari doonaan xiriirka Soomaaliya iyo Jabuuti, xaaladda amniga gobolka iyo saameynta xiisadaha ka taagan Bariga Dhexe.
Dalka Jabuuti ayaa muddo dheer door muhiim ah ka ciyaaray taageerada dowladnimada Soomaaliya iyo dadaallada nabadeynta ee dalka, iyadoo labada dal ay leeyihiin xiriir dhow oo dhinacyada siyaasadda, amniga iyo dhaqaalaha ah.
Safarka Madaxweynaha ayaa kusoo aadaya xilli Soomaaliya ay wajahaysa xaalado siyaasadeed oo la xiriira muranka ka taagan hannaanka doorashooyinka iyo xaaladaha kale ee gudaha.
