Wararka24: 12-02-2026 Wasiirka Wasaaradda Qoyska iyo Hormarinta Xuquuqul Insaanka Xukuumadda Federaalka Soomaaliya Khadiija Maxamed Al-Makhzoumi ayaa khudbad ka jeedisay shirka sanadlaha ah ee Haweenka Adduunka oo ka socda magaalada New York ee dalka Mareykanka.
Wasiiradda oo hoggaamineysa wafdi ka socda Soomaaliya ayaa shirka uga hadashay horumarka ay dowladda Soomaaliya ka gaartay dhinacyada xuquuqda aadanaha iyo horumarinta haweenka.
Khadiija Maxamed Al-Makhzoumi ayaa sheegtay in guulaha ugu muhiimsan ay ka mid yihiin dhismaha guddiga madaxa bannaan ee Xuquuqul Insaanka Qaranka iyo dadaallada lagu xoojinayo ilaalinta xuquuqda haweenka.
Waxay sidoo kale tilmaantay in Soomaaliya ay dib u xoojisay shaqada la xiriirta horumarinta xuquuqda aadanaha iyo ka qaybgalka haweenka ee arrimaha bulshada iyo dowladnimada.
Inta ay wafdiga Soomaaliya ku sugan yihiin magaalada New York, wasiiradda ayaa la filayaa inay kulamo la yeelato qaar ka mid ah madaxda ka qaybgaleysa shirka, isla markaana ay khudbado kale ka jeediso shirar dheeraad ah oo la qorsheeyay.
