Wararka24: 17-02-2026 Wasiirka Arrimaha Dibadda Somaliland, Cabdiraxmaan Daahir Aadan, ayaa beeniyay hadal uu dhawaan jeediyay Madaxweynaha Soomaaliya, Xasan Sheekh Maxamuud, oo sheegay in Somaliland iyo Israa’iil ay ka wada hadleen dib u dejinta qaxootiga Falastiiniyiinta.
Wasiirka oo wareysi gaar ah siiyay BBC Somali ayaa sheegay in eedeyntaasi aysan sal iyo raad toona lahayn, isla markaana Somaliland iyo Israa’iil ay horey u beeniyeen jiritaanka wada-hadal la xiriira arrimahaas.
Cabdiraxmaan Daahir Aadan ayaa sheegay in Madaxweynaha Soomaaliya looga baahan yahay inuu keeno caddeymo muujinaya halka ay Somaliland iyo Israa’iil kaga wada hadleen qaxootiga Falastiin, isagoo tilmaamay in hadalkaasi u muuqdo mid siyaasadeed oo la xiriira khilaafka ka dhashay aqoonsiga Somaliland.
Wasiirka ayaa sidoo kale beeniyay eedeynta ah in Somaliland ay Israa’iil kala heshiisay in saldhig milatari laga siiyo xeebaha Gacanka Cadmeed, wuxuuna sheegay in arrintaasi aanay jirin, isla markaana aan wax heshiis ah laga gaarin dhinacaas.
Dhankiisa, Wasiirka Arrimaha Dibadda Israa’iil, Gideon Sa’ar, ayaa horey u sheegay in arrimaha Falastiin aysan qayb ka ahayn wax wada-hadal ah oo dhex maray Israa’iil iyo Somaliland, taas oo sii xoojinaysa beeninta labada dhinac.
Wararka ku saabsan in dib u dejin loo samaynayo qaar kamid ah dadka reer Falastiin ee lagu geynayo Somaliland ayaa horey uga soo dhex muuqday baraha bulshada, kadib warbixinno ay baahiyeen wakaaladaha Reuters iyo AP oo xusayay qorshayaal la xiriira in dad Falastiiniyiin ah loo raro dalal kale.
