Wararka24: 17-02-2026;Taliska Ciidanka Asluubta Soomaaliyeed, gaar ahaan ilaalada Xabsiga Dhexe ee Muqdisho, ayaa muujiyay feejignaan sare kadib markii ay gacanta ku dhigeen askari ka tirsan ciidanka oo lagu qabtay isagoo isku dayaya inuu gudaha xabsiga geliyo waxyaabo maanka dooriya.
Eedeysanaha, oo lagu magacaabo Ilyaas Sheekh Nuur kana tirsanaa Ciidanka Asluubta, ayaa la sheegay in la qabtay xilli uu isku dayayay inuu xabsiga soo geliyo kaniiniyada loo yaqaan “Bilibili,” kuwaas oo uu ku dhex qariyay sigaar si uu uga dhuunto baaritaanka amniga.
War rasmi ah oo ka soo baxay Taliska Ciidanka Asluubta ayaa lagu sheegay in falka la ogaaday kadib baaritaanno joogto ah oo lagu sameeyo shaqaalaha iyo cid kasta oo soo galeysa xabsiga, si loo xaqiijiyo amniga maxaabiista iyo nidaamka xarunta.
Mas’uuliyiinta ayaa xaqiijiyay in eedeysanaha uu hadda ku jiro gacanta Hoggaanka Baarista Dambiyada iyo Kormeerka Xabsiyada ee Ciidanka Asluubta, islamarkaana loo gudbin doono maxkamadda awoodda u leh si sharciga loo waafajiyo.
Taliska Ciidanka Asluubta ayaa mar kale adkeeyay in aysan jiri doonin wax tanaasul ah oo laga sameeyo la dagaallanka maandooriyaha iyo fal kasta oo wax u dhimaya amniga xabsiyada dalka.
