Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ka jeediyay khudbad dhinacyo badan taabaneysa Shir-madaxeedka labaad ee Talyaaniga iyo Afrika, oo lagu qabtay magaalada Addis Ababa, kaas oo diiradda lagu saaray xoojinta iskaashiga dhaqaale iyo mid istiraatiiji ah ee u dhexeeya Talyaaniga iyo dalalka Afrika.
Madaxweynaha ayaa khudbaddiisa ku iftiimiyay fursadaha maalgashi ee ka jira Soomaaliya, isaga oo carrabka ku adkeeyay in mudnaanta dalka ay tahay xoojinta kaabeyaasha dhaqaalaha, abuurista shaqooyin dhallinyarada, sugidda isku filnaanshaha cunnada, iyo isku xirka dhaqaalaha Soomaaliya suuqyada heer gobol iyo heer caalami.
Xasan Sheekh Maxamuud ayaa sheegay in horumarka Afrika uu ku salaysan yahay ixtiraamka gobonnimada, midnimada dhuleed iyo madax-bannaanida dalalka, si waafaqsan mabaadi’da Qaramada Midoobay iyo Midowga Afrika.
Wuxuu tilmaamay in tallaabooyin hal-dhinac ah oo lagu wiiqayo madax-bannaanida dalalka ay khatar ku yihiin nidaamka caalamiga ah, isla markaana ay tahay in si mideysan looga hortago faragelin kasta oo dibadeed oo xasillooni darro abuureysa.
Madaxweynaha ayaa sidoo kale adkeeyay muhiimadda ay leedahay isku xirnaanta nabadda iyo horumarka, isaga oo muujiyay baahida loo qabo in la xoojiyo iskaashiga amniga ee u dhexeeya Talyaaniga iyo dalalka Afrika. Wuxuu si gaar ah ugu mahadceliyay Talyaaniga taageerada ay siiyaan Hawlgalka Taageerada iyo Xasillinta Midowga Afrika ee Soomaaliya (AUSSOM).
Ugu dambeyn, Madaxweynaha ayaa sheegay in Soomaaliya ay diyaar u tahay inay sii xoojiso wada-shaqeynta kala dhexeeya Talyaaniga iyo bahwadaagta Qorshaha Mattei, iyadoo la raacayo mabaadi’ ku dhisan kalsooni, dan-wadaag iyo aragti mideysan oo lagu gaari karo Afrika nabad ah, xasilloon, isla markaana barwaaqo ah.
