Dowladda Kenya ayaa ku dhawaaqday inay dib u furayso xuduudda ay la wadaagto Soomaaliya, ku dhowaad 15 sano kaddib markii la xiray sababo la xiriira weerarro amni oo ay Kenya kula kulantay gudaha dalkeeda.
Madaxweynaha Kenya, William Ruto, oo booqasho ku tegay magaalada Mandera ee waqooyi-bari Kenya, ayaa sheegay in go’aanka dib u furista xuduudda uu ku saleysan yahay qiimeyn amni oo muddo dheer socotay. Waxa uu xusay in ciidamo dheeraad ah la geyn doono goobaha xuduudka si loo xaqiijiyo in tallaabadu aysan khatar ku noqon amniga Kenya.
Ruto ayaa carrabka ku adkeeyay in xirnaashaha muddada dheer ee xuduuddu uu saameyn ku yeeshay xiriirka bulsho iyo mid dhaqaale ee ka dhexeeya dadka Mandera iyo ehelkooda ku sugan Soomaaliya. “Ma aha wax la aqbali karo in muwaadiniinta Mandera ay muddo dheer ka go’naadaan ehelkooda iyo deriskooda ku sugan Soomaaliya,” ayuu yiri, isaga oo ku baaqay in bulshada deegaanka ay la shaqeyso laamaha amniga si looga hortago falalka argagixisada.
Go’aankan ayaa imaanaya kaddib weerarro culus oo ay Al-Shabaab ka fulisay gudaha Kenya sanadihii la soo dhaafay, kuwaas oo ay ka mid yihiin weerarkii xarunta ganacsiga ee Westgate ee Nairobi 2013-kii iyo weerarkii Jaamacadda Garissa 2015-kii, kuwaas oo sababay khasaare naf iyo mid maaliyadeed. Dowladda Kenya ayaa sheegtay in casharro laga bartay dhacdooyinkaas, isla markaana la xoojiyay tallaabooyinka amni ee xuduudaha.
Sidoo kale, Kenya waxay horay u billowday dhismaha xayndaab xuduudeed oo dhererkiisu yahay 680 km si loo xakameeyo khataraha amni, balse mashruucaasi ma uusan dhammaan, kaddib caqabado dhaqaale iyo farsamo. Dowladda Kenya ayaa hadda sheegtay in dib u furista xuduudda lagu wadi doono hab taxaddar leh, iyadoo la ilaalinayo ammaanka, isla markaana la fududeynayo isu-socodka ganacsiga iyo xiriirka bulshada ee labada dal.
