Wararka24: 12-02-2026 Madaxweynaha Soomaaliya, Xasan Sheekh Maxamuud, ayaa shaaciyey istiraatiijiyad saddex-weji leh oo dowladdiisu ku doonayso inay ku fashiliso tallaabada ay Israa’iil ku aqoonsatay maamulka Somaliland.
Wareysi gaar ah oo uu siiyay wargeyska Asharq Al-Awsat, ayuu madaxweynuhu ku sheegay in Muqdisho ay xoojisay wada shaqeyn diblomaasiyadeed oo dhow oo ay la leedahay Sacuudi Carabiya iyo quwadaha kale ee gobolka si loo go’doomiyo tallaabadaas.
Madaxweynuhu wuxuu caddeeyey in Soomaaliya ay dhiseyso mowqif mideysan oo Carab, Islaam iyo Afrikaan ah, isla markaana ay arrinta u gudbisay Qaramada Midoobay, Midowga Afrika iyo Ururka Iskaashiga Islaamka (OIC).
Wuxuu sheegay in Muqdisho ay dalbatay fadhi rasmi ah oo Golaha Ammaanka ah, maadaama Soomaaliya xubin aan joogto ahayn ka tahay golahaas. Xasan Sheekh ayaa aqoonsiga ku tilmaamay xadgudub ka dhan ah midnimada iyo madax-bannaanida Soomaaliya, isaga oo ka digay in tallaabadu ay khatar ku tahay amniga gobolka.
sedaxda Qorsha
Cadaadis sharci & diblomaasiyadeed:
In arrinta la geeyo hay’adaha caalamiga ah (QM, AU, OIC) lana helo go’aanno iyo cambaarayn rasmi ah.
Mowqif mideysan oo goboleed:
In la dhiso isbahaysi Carab, Islaam iyo Afrikaan ah gaar ahaan taageerada Sacuudiga si loo ilaaliyo midnimada Soomaaliya loona sugo amniga Badda Cas.
Wada-hadal qaran:
In gudaha dalka lagu xalliyo tabashooyinka, lana wiiqo doodaha gooni-u-goosadka iyada oo la adeegsanayo hannaan dastuuri ah oo loo dhan yahay.
Madaxweynuhu wuxuu xusay muhiimada istiraatiijiyadeed ee marin-biyoodka Baab-al-Mandab, oo ah halbowle ay maraan ku dhowaad 12% ganacsiga caalamka, isaga oo ka digay in galaangal shisheeye oo iska soo horjeeda uu beddeli karo dheelitirka awoodda gobolka, halisna gelin karo danaha dalalka ku teedsan Badda Cas.
Xasan Sheekh ayaa sidoo kale digniin u diray jilayaasha gobolka ee raadinaya “danaha gaaban,” isaga oo ku boorriyey in arrinta Somaliland aan loo arkin mid maxalli ah oo keliya, balse ay tahay mid saameyn ku leh xasilloonida Geeska Afrika iyo amniga caalamiga ah.
