Dagaal culus ayaa ka qarxay duleedka Degmada Jamaame ee Koonfurta Gobolka Jubbada Hoose, kadib markii Ciidamada Daraawiishta Dowlad-goboleedka Jubbaland ay duullaan xooggan ku qaadeen dagaalyahannada Al-Shabaab.
Wararka hordhaca ah ayaa sheegaya in khasaare xooggan uu labada dhinac soo kala gaaray, inkastoo aan weli la helin tiro rasmi ah oo dhimasho iyo dhaawac ah. Goobjoogayaal ayaa tilmaamaya in dagaalku uu yahay mid aad u xooggan, isla markaana rasaas culus la is-weydaarsanayo.
Sidoo kale, ilo amni ayaa xaqiijiyay in duqeymo cirka ah ay socdaan, kuwaas oo la sheegay in ay iska kaashanayaan Ciidamada Kumaandooska Danab iyo saaxiibada Mareykanka, iyada oo lagu beegsanayo saldhigyo iyo goobaha ay ku dhuumaaleysanayaan Al-Shabaab.
Dowlad-goboleedka Jubbaland ayaa maalmihii u dambeeyay waday diyaargarow ciidan oo ka dhan ah Al-Shabaab, gaar ahaan agagaarka Jamaame, halkaas oo kooxdaasi lagu tuhmayay inay ka abaabulayeen weerarro cusub oo lagu beegsanayo ciidamada iyo shacabka.
Howlgalladan ayaa qeyb ka ah dadaallada Dowladda Federaalka iyo maamul-goboleedyada lagu doonayo in lagu xoojiyo amniga, laguna ciribtirayo haraadiga Al-Shabaab, si looga hortago in mar kale ay weerarro ka fuliyaan gobolka Jubbada Hoose.
