Wararka24: 7-02-2026:Lix muwaadin oo u dhashay dalka Marooko oo ku xiran xabsiga weyn ee magaalada Garoowe, xarunta maamul goboleedka Puntland, ayaa baaq u diray dowladda dalkooda Marooko, iyagoo sheegay in ay weli ku xiran yihiin si sharci-darro ah, inkastoo ay horey maxkamad uga weysay eedeymo loo jeediyay.
Mid ka mid ah maxaabiista, Maxamed Al-Busadi, ayaa muuqaal lagu baahiyay baraha bulshada ku sheegay in ay muddo laba sano ka hor maxkamad ku weysay eedeymo la xiriiray falal amni dara ah, isla markaana lagu xukumay in dalka laga tarxiilo, balse aan weli la fulin go’aankaas.
Wuxuu sheegay in Guddiga Caalamiga ah ee Laanqayrta Cas (ICRC) ay booqdeen bishii Janaayo, ayna u sheegeen in galalka dacwadooda loo gudbiyay safaaradda Marooko ee Nairobi.
Sida ay maxaabiistu sheegeen, arrinta dib-u-celintooda ayaa hadda ku xiran soo helidda dukumentiyada safarka iyo tigidhada diyaaradda, kuwaas oo ay sheegayaan in dowladda Marooko oggolaatay kharashkooda. Waxay sidoo kale ka cabanayaan duruufo nololeed oo adag oo ka jira xabsiga, gaar ahaan helitaanka cunto iyo biyo ku filan.
Muuqaalka la baahiyay ayaa dhaliyay falcelin ballaaran oo ka dhex dhalatay bulshada Marooko, iyadoo dad badan ay ku baaqeen in si degdeg ah loo soo celiyo muwaadiniintan. Dhanka kale, waxaa jira dad su’aalo ka keenay sababihii ay Soomaaliya u tageen iyo duruufihii markii hore loo xiray.
Ilaa hadda, maamulka Puntland iyo dowladda Marooko midna si rasmi ah ugama hadlin cabashadan ay soo gudbiyeen maxaabiista ku xiran Garoowe.
Warar xaqiqda ku saleysan oo muhim ah kalasoco WARARKA24
