Wararka24: 4-02-2026: Munaasabad xil-wareejin ah ayaa maanta ka dhacday xarunta Wasaaradda Gaashaandhigga, kaddib markii xilka Taliyaha Ciidanka Xoogga Dalka Soomaaliyeed laga qaaday Sarreeye Gaas Odowaa Yuusuf Raage, sida ay horey u ansixiyeen Golaha Wasiirrada Soomaaliya toddobaadkii la soo dhaafay.
Jenaraal Odowaa Yuusuf Raage ayaa xilka si rasmi ah ugu wareejiyay Gaashaanle Sare Ibraahim Maxamed Maxamuud, oo ah sarkaal ka tirsan Ciidanka Xoogga Dalka Soomaaliyeed, kaas oo dhawaan loo magacaabay xilka taliska guud. Munaasabadda xil-wareejinta waxaa ka qayb-galay mas’uuliyiin ka tirsan dowladda Federaalka Soomaaliya iyo saraakiil sare oo ciidan.
Taliyaha cusub ayaa horey u soo maamulay qeybta taakulada ee Ciidanka Xoogga Dalka, waxaana uu tababarro sare kusoo qaatay dalka Turkiga, sida ay sheegeen mas’uuliyiin ka tirsan wasaaradda. Isbeddelkan ayaa yimid kaddib soo jeedin ka timid Wasaaradda Gaashaandhigga, taas oo ay ansixiyeen Golaha Wasiirrada.
Jenaraal Odowaa Yuusuf Raage ayaa xilka Taliyaha CXDS horey u soo qabtay labo jeer, kuwaas oo kala ahaa sanadkii 2019 iyo 10-kii November 2024. Mas’uuliyiin ka tirsan dowladda ayaa sheegay in Odowaa lagu xusuusan doono doorkii uu ka qaatay hawlgallada lagu xoojinayay amniga iyo dadaalladii lagu tayeynayay dhismaha iyo qalabeynta Ciidanka Xoogga Dalka Soomaaliyeed.
