Diyaaradaha dagaalka ee F-16 ayaa saaka sameeyay dhoolatus milatari oo ka dhacay magaalada Muqdisho, iyaga oo ku duulayay joog hoose, taas oo laga arkayay qeybo ka mid ah caasimadda.
Diyaaradahan casriga ah ayaa dhawaan Muqdisho keentay dowladda Turkiga, waxaana lagu arkayay iyagoo ay wehlinayaan diyaarado qumaatiga u kaca ah oo horey dalka loo keenay, kuwaas oo haatan ay ku shaqeeyaan Ciidamada Cirka Soomaaliya.
Dhoolatuskan ayaa waxaa qayb ka ahaa ciidamo Soomaaliyeed oo ka tirsan Cirka, kuwaas oo wada-shaqeyn dhow la leh saraakiil Turkiga ka socda, sida ay sheegeen ilo amni. Tallaabadan ayaa muujinaysa heerka wada-shaqeyn ee sii kordhaya ee dhinaca tababarka iyo hawl-gallada cirka.
Iskaashiga amni ee u dhexeeya Soomaaliya iyo Turkiga ayaa sii xoogeysanaya, iyadoo Ankara ay Soomaaliya u soo dirtay saraakiil ka kala socda ciidamada Cirka, Badda iyo Lugta, kuwaas oo door ka qaadanaya xoojinta wada-shaqeynta milatari ee labada dal.
Sidoo kale, Turkiga ayaa xoojiyay joogitaankiisa milatari ee Soomaaliya, iyadoo maraakiib casri ah ay ku sugan yihiin biyaha dalka. Ilo xog-ogaal ah ayaa sheegay in maraakiibtaasi ay ka qeyb qaadanayaan ilaalinta mashaariic la xiriira tamarta, xeryaha la dhisayo, iyo kaabayaasha istiraatiijiga ah.
Arrimahan ayaa lagu fasiray kuwo sii xoojinaya iskaashiga istiraatiijiga ah ee u dhexeeya Soomaaliya iyo Turkiga, gaar ahaan dhinacyada ammaanka, tamarta iyo tiknoolajiyadda, xilli Ankara ay kordhinayso joogitaankeeda iyo doorkeeda gobolka.
