Wararka24: 2-02-2026:Dokumiintiyo cusub oo ay baahisay Waaxda Caddaaladda Mareykanka (DOJ), kuwaas oo la xiriira faylasha maalqabeenkii geeriyooday Jeffrey Epstein, ayaa muujinaya is-dhaafsi qoraallo iyo fikrado ganacsi oo ay dad ku dhow Epstein ku soo hadal-qaadeen Somaliland, oo ay ku jiraan arrimo la xiriira maalgashi iyo dood ku saabsan aqoonsi.
Sida ku cad dukumiintiyada la dusiyey, koox la xiriirtay Epstein ayaa sannado kala duwan isdhaafsaday iimayllo ka hadlaya fursado dhaqaale oo laga fulin karo Somaliland, gaar ahaan dhinacyada kaabayaasha dekedaha, adeegyada maaliyadeed, iyo mashaariic suurtagal ah oo warbaahin iyo wax-soo-saar leh. Dukumiintiyadu ma muujinayaan heshiisyo la fuliyey, balse waxay tilmaamayaan fikrado iyo soo-jeedinno ganacsi.
Mid ka mid ah iimayllada la shaaciyey ayaa la diray Abriil 2018, waxaana lagu lifaaqay fayl cinwaankiisu ahaa “Aqoonsiga Somaliland Taariikh Kooban,” sida ku xusan qoraallada. Dukumiintiyadu waxay muujinayaan in mawduuca aqoonsiga Somaliland uu ka mid ahaa doodaha guud ee ganacsi iyo istiraatiijiyadeed ee lagu xusay isgaarsiintaas.
Qoraallo kale oo taariikhdoodu ku beegan tahay 2012–2013 ayaa ka hadlayay fursado la xiriira dhoofinta biyaha agagaarka Berbera, iyo hindise ku saabsan dhismaha istuudiyo filimaan oo loogu magac daray “Somaliwood,” iyadoo lagu xusay in deegaanka Somaliland uu ku habboon yahay duubista filimada. Qoraalladaasi waxay ahaayeen soo-jeedinno balse fulin rasmi ay jirin.
Sidoo kale, dukumiinti 2013 ah ayaa tixraacay dood ku saabsan nidaamyada lacag-diris ee gobolka, gaar ahaan doorka xawaaladaha, iyada oo lagu tilmaamay arrintaas fursad dhaqaale oo suurtagal ah, marka la eego ku-tiirsanaanta lacagaha dibadda ee bulshada.
Somaliland ayaa tan iyo 1991 u shaqaynaysay sidii maamul iskiis u gaar ah, balse weli ma helin aqoonsi caalami ah oo buuxa. Soo bixitaanka xogtan ayaa imanaya xilli xasaasi ah, kadib markii 26-kii December Israa’iil ay ku dhawaaqday inay aqoonsatay Somaliland, tallaabo ay Dowladda Federaalka Soomaaliya ku tilmaantay mid ka hor imanaysa sharciga caalamiga ah, isla markaana dhalisay dood diblomaasiyadeed oo ballaaran.
Mas’uuliyiinta Mareykanka iyo hay’adaha ku lugta leh faylasha Epstein ayaan faahfaahin dheeraad ah ka bixin ujeeddada ama natiijada doodaha ku xusan dukumiintiyada, iyaga oo ku ekaaday in la shaaciyo qoraallada la helay. Xogtan cusub waxay weli ku jirtaa marxalad qiimeyn iyo faham guud oo ku saabsan waxa ay dhab ahaan ka dhigan tahay.
