Wararka24: 1-02-2026: Maamullada Puntland iyo Jubbaland ayaa si adag uga falceliyay tallaabadii maanta lagu celiyay ciidamadii ay u soo direen magaalada Muqdisho, kadib markii Dowladda Federaalka Soomaaliya ay diiday in diyaaradaha siday ciidamadaasi ay ka degaan Garoonka Diyaaradaha Aadan Cadde.
Puntland oo warsaxaafadeed soo saartay ayaa cambaareysay go’aankaas, waxayna ku sheegtay mid halis geliyay amniga saraakiil iyo ciidamo hordhac u ahaa safarka la filayay in Madaxweyne Saciid Cabdullaahi Deni uu ku yimaado caasimadda. Puntland ayaa ku eedeysay Dowladda Federaalka in tallaabadan looga gol leeyahay fashilinta wada-hadallada la qorsheeyay inay u bilaabmaan Villa Soomaaliya iyo Golaha Mustaqbalka Soomaaliyeed.
“Illaa waqtigii ay Dowladda Puntland iyo guud ahaan Golaha Mustaqbalka Soomaaliyeed aqbaleen ka qayb-galka gogosha ay dhigtay DFS, Madaxweynaha wuxuu qaaday tallaabooyin si cad u muujinaya ujeeddo ah in gogoshaas la fashiliyo,” ayaa lagu yiri bayaanka Puntland.
Dhankeeda, Jubbaland ayaa iyaduna sheegtay in ciidamada iyo wafdiga la socday si rasmi ah loogu wargeliyay Hay’adda Duulista Rayidka, guddiyada qaban-qaabada shirka iyo laamaha amniga ee Dowladda Federaalka, balse si lama filaan ah hawada looga celiyay, iyada oo aan la hubin in diyaaraddu haysatay shidaal ku filan oo ay dib ugu laabato Kismaayo.
“Go’aankan deg-degga ah wuxuu muujinayaa masuuliyad-darro weyn, wuxuuna halis geliyay nolosha wafdiga hordhaca ah,” ayaa lagu yiri bayaanka Jubbaland, iyadoo DFS lagu eedeeyay inay ka caga-jiidaysay qabsoomidda shirka wada-tashiga.
