Wararka24: 1-02-2026:Madaxweynayaasha maamul-goboleedyada Jubbaland iyo Puntland ayaa la sheegay inay Muqdisho u soo hormariyeen ciidamo hubeysan oo ilaalo ah, xilli ay isu diyaarinayaan ka qayb-galka shirka wada-tashiga qaran ee u dhexeeya Dowladda Federaalka Soomaaliya iyo Golaha Mustaqbalka Soomaaliyeed.
Ciidamadan oo si gaar ah u tababaran una qalabeysan ayaa ka soo ambabaxay magaalooyinka Kismaayo iyo Garoowe, iyagoo la filayo inay sugaan amniga Madaxweyneyaasha Axmed Maxamed Islaam (Axmed Madoobe) iyo Saciid Cabdullaahi Deni inta ay joogaan caasimadda.
Muuqaallo lagu baahiyay baraha bulshada ayaa muujinaya ciidamada oo wata hub culus, isla markaana diyaarado ku imaanaya magaalada Muqdisho. Ilo-wareedyo ayaa sheegaya in ciidamadaasi ay maalmo joogi doonaan caasimadda inta ay socdaan wada-hadallada siyaasadeed.
Dhanka kale, waxaa la diyaariyay goobaha ay degi doonaan labada madaxweyne, iyadoo la adkeeyay habraacyada amniga. Qaban-qaabadii ugu dambeysay ee shirka ayaa haatan ka socota Muqdisho, waxaana guddiyada farsamo ee Dowladda Federaalka iyo Golaha Mustaqbalka diyaariyeen ajendaha shirka.
Waxaa la filayaa in madaxda ka qayb-galeysa wada-hadallada ay maanta isugu soo xaroodaan caasimadda, si shirka uu si rasmi ah u furmo berri oo ku beegan 2-da Febraayo 2026.
Wakiillada beesha caalamka ayaa si dhow ula socda shirka, iyagoo horey u muujiyay taageerada ay u hayaan gogosha wada-hadalka iyo ka qayb-galka dhinacyada mucaaradka.
Ajendaha shirka ayaa la filayaa inuu diiradda saaro arrimaha doorashooyinka, dib-u-eegista dastuurka, midnimada dalka, dagaallada ka dhanka ah argagixisada iyo xaaladaha abaaraha, sida ay sheegeen guddiyada farsamo ee labada dhinac.
Arrintan ayaa imaneysa kaddib markii hoggaamiyeyaasha Jubbaland iyo Puntland ay ka gaabsadeen inay toos u tagaan Villa Soomaaliya, iyagoo doorbiday in wada-hadalladu ka dhacaan goob ka baxsan madaxtooyada oo ay u arkaan mid la isku halleyn karo.
Muqdisho ayaa sidaas darteed gelaysa mashquul siyaasadeed oo culus bilowga bisha Febraayo, iyadoo markii ugu horreysay muddo dheer ay miis wada-hadal ku kulmayaan Dowladda Federaalka iyo maamul-goboleedyada Jubbaland iyo Puntland, kuwaas oo ay horey u dhex yaalleen khilaafyo siyaasadeed.
