Wararka24: 29-01-2026 Ciidamada ammaanka iyo sirdoonka Turkiga (MIT) ayaa shaaciyay inay fashiliyeen shirqool basaasnimo oo halis ah, kaas oo la xiriiray sirdoonka Iran, kadib howlgal ballaaran oo laga fuliyay shan gobol oo dalkaas ka tirsan.
Sida uu qoray wargeyska Daily Sabah, lix qof ayaa la qabtay Arbacadii, kuwaas oo lagu eedeeyay inay qorsheynayeen ururinta xog xasaasi ah oo ku saabsan saldhigga cirka ee Incirlik ee gobolka Adana, oo ah xarun istiraatiiji ah oo si wadajir ah u maamulaan Turkiga iyo Mareykanka. Shabakadda la qabtay ayaa la sheegay inay hoggaaminayeen laba wakiil oo sirdoonka Iran ka tirsan, kuwaas oo magacyadooda loo yaqaanay “Haji” iyo “Doctor”.
Baaritaanno hordhac ah ayaa muujiyay in eedeysanayaashu ay qorsheynayeen inay sawirro iyo muuqaallo ka duubaan gudaha iyo hareeraha saldhigga Incirlik, iyagoo adeegsanaya farsamooyin basaasnimo. Shan ka mid ah dadka la qabtay ayaa u dhashay Turkiga, halka mid kalena uu yahay muwaadin Iiraani ah, waxaana lagu soo oogay dacwado la xiriira helitaanka xog sir ah oo dowladeed ujeeddo basaasnimo awgeed.
Warbixintu waxay intaas ku dartay in qaar ka mid ah xubnaha shabakadda ay tababaro gaar ah oo ku saabsan adeegsiga diyaaradaha aan duuliyaha lahayn (drones) ku soo qaateen gudaha Iran intii u dhaxaysay Agoosto iyo Sebtembar 2025. Sidoo kale, waxaa la ogaaday in shabakadda ay isku dayday inay drones hubeysan u dhoofiso Jamhuuriyadda Qubrus (Koonfurta), oo lagu tuhunsan yahay inay xarun u noqotay hawlgallada sirdoonka Mareykanka iyo Ingiriiska xilliyadii dambe.
Mid kamid ah eedeysanayaasha u dhashay Turkiga ayaa qirtay in loo soo bandhigay qorshe lagu beegsanayo, laguna khaarajinayo mucaarad ku sugan Turkiga oo ka soo horjeeda nidaamka Iran.
Dhacdadan ayaa kusoo aadeysa xilli ay sii kordhayso xiisadda u dhaxeysa Washington iyo Tehran. Madaxweynaha Mareykanka Donald Trump ayaa la sheegay inuu miiska saaray xulashooyin milatari, kadib caburinta xooggan ee ay Iran kula kacday dibadbaxyada dowladda looga soo horjeedo. Dhanka kale, Mareykanka ayaa xoojiyay joogitaankiisa milatari ee Bariga Dhexe, iyadoo markabka diyaaradaha xambaara ee USS Abraham Lincoln uu gaaray biyaha gobolka.
Guddoomiyaha Baarlamaanka Iran, Maxamed Baqir Ghalibaf, ayaa dhawaan ku hanjabay in Tehran ay qaadi karto weerarro ka hortag ah haddii ay dareento khatar soo fool leh, isagoo sheegay in dhammaan saldhigyada iyo maraakiibta Mareykanka ee gobolka ay noqon doonaan bartilmaameed “sharci ah”.
