Wararka24: 29-01-2026:Ciidanka Xoogga Dalka Soomaaliyeed ayaa saakay howlgal qorsheysan ka fuliyay deegaanka Alanley ee gobolka Shabeellada Dhexe, halkaas oo ay ku burburiyeen fariisimo ay ku sugnaayeen maleeshiyaad ka tirsan kooxda Al-Shabaab.
Howlgalka ayaa si gaar ah loogu beegsaday firxadkii ka haray jabkii dhawaan kooxda loogu geystay deegaanka Jabad-Godane, waxaana ciidamada ay cagta mariyeen dhammaan goobihii ay kooxdaasi gabaadka ka dhiganaysay ee Alanley.
Saraakiisha hoggaamineysa howlgalka ayaa sheegay in ciidamada ay si buuxda ula wareegeen aagga, isla markaana ay burburiyeen xarumihii ay Khawaarijtu ka abaabulayeen falalka amni-darrada ah.
Waxay sidoo kale saraakiishu xaqiijiyeen in howlgallada lagu baadi-goobayo firxadka kooxda ay sii socon doonaan, illaa laga xaqiijinayo amniga guud ee deegaannada gobolka Shabeellada Dhexe.
Howlgalkan ayaa kusoo aadaya xilli ay ciidamada dowladda iyo kuwa deegaanka kordhiyeen cadaadiska milatari ee ka dhanka ah Al-Shabaab, si looga ciribtiro joogitaankooda una sugaan amniga shacabka.
