Wasiirka Socdaalka dalka Spain, Elma Saiz, ayaa xaqiijisay in dowladda hantiwadaagga ah ee Spain ay soo saari doonto wareegto gaar ah oo sharci deggenaansho lagu siinayo kumannaan muhaajiriin ah, taas oo aan u baahnayn ansixinta Baarlamaanka.
Wareegtadan cusub ayaa quseyn doonta muhaajiriinta aan wax dambiyo ah ku lahayn dalka, gaar ahaan kuwa yimid Spain ka hor bilowgii sannadka 2026, isla markaana ku noolaa dalka in ka badan shan bilood ilaa 31-ka December 2025.
Mas’uuliyiinta Spain ayaa sheegay in tallaabadan lagu doonayo in lagu fududeeyo is-dhexgalka bulshada, lagu xoojiyo xuquuqda aadanaha, isla markaana muhaajiriinta loogu oggolaado ka qeybqaadashada dhaqaale ee dalka.
“Maanta waa maalin taariikhi ah oo dalkeenna u gaar ah,” ayay tiri Wasiir Elma Saiz, iyadoo intaa ku dartay in dowladdu ay dhiseyso nidaam socdaal oo ku saleysan xuquuqda aadanaha, wada-noolaanshaha iyo is-ixtiraamka bulshada.
Soomaali badan oo ku nool dalka Spain ayaa la filayaa inay ka faa’iideystaan go’aankan, gaar ahaan kuwa aan weli haysan sharci deggenaansho rasmi ah. Qaar kamid ah Soomaalida ayaa dalkaas ku galay si sharci darro ah, halka kuwo kalena ay horey u heleen sharciyo ku-meel-gaar ah.
Maxamed Cibaar Diiriye, oo ku nool magaalada Madrid, ayaa u sheegay BBC-da in muhaajiriin badan oo Afrikaan ah oo ku sugan Spain aysan sharci haysan, balse wareegtadan ay fursad u siin doonto inay si rasmi ah uga shaqeystaan dalka oo ay helaan nolol deggan.
Cibaar ayaa xusay in Soomaalida ku nool Spain ay ka mid yihiin muhaajiriinta si weyn uga faa’iideysan doona tallaabadan, maadaama intooda badan ay dalka kusoo galeen dhinaca badda, isla markaana ay muddo ku noolayeen xaalad sharci la’aan ah.
“Arrintan waa mid aad loo sugayay,” ayuu yiri, isagoo intaa ku daray in muhaajiriinta hadda heli doonaan fursado shaqo, adeegyo bulsho, iyo ka mid noqoshada nidaamka rasmiga ah ee dalka Spain.
