Wararka24: 26-01-2026 Somaliland ayaa si rasmi ah u beenisay warbixin uu baahiyay telefishinka Al Arabiya, taas oo lagu sheegay in ciidamo ka yimid meelo kale ay ku sugan yihiin deegaanno ka tirsan gobolka Awdal, iyadoo warbixintaas ku tilmaantay mid aan sal iyo raad toona lahayn.
War-saxaafadeed kasoo baxay Wasaaradda Arrimaha Dibadda iyo Iskaashiga Caalamiga ah ee Somaliland ayaa lagu caddeeyay in guud ahaan gobolka Awdal uu hoos yimaado maamulka Somaliland, isla markaana amniga deegaannadaas ay si buuxda u sugayaan ciidamada qaranka Somaliland.
Wasaaraddu waxay sheegtay inaysan jirin wax ciidamo shisheeye ama xoogag kale oo ka hawlgala gobolka, iyadoo ku tilmaantay wararkaasi kuwo marin habaabin ah oo aan waafaqsanayn xaqiiqda ka jirta dhulka.
Beeninta Somaliland ayaa timid kadib markii Al Arabiya ay sidoo kale tabisay in maalmo xiriir ah ay ka jireen iska horimaadyo hubeysan gudaha gobolka Awdal, kuwaas oo ay sheegtay inay u dhexeeyaan dhinacyo isku haya aragtiyo siyaasadeed oo kala duwan.
Gobolka Awdal, oo hore loogu yaqaani mid ka mid ah deegaannada ugu xasilloon waqooyiga Soomaaliya, ayaa bilihii la soo dhaafay wajahaya xiisado amni iyo ku siyaasadeed oo isa soo taraya, kuwaas oo abuuray walaac ku saabsan mustaqbalka xasilloonida deegaanka.
Dhanka kale, Dowladda Federaalka Soomaaliya ayaa marar badan ku celcelisay inay si adag uga soo horjeeddo tallaabo kasta oo ay ku tilmaantay mid wax u dhimaysa midnimada iyo wadajirka dhuleed ee dalka somaaliya, iyadoo hoosta ka xarriiqday in xal waara oo lagu maareeyo khilaafaadka siyaasadeed uu ku imaan karo oo kaliya wada-hadal ku dhisan dastuurka iyo is-afgarad qaran.
