Wararka24: 25-01-2026 Guddoomiyaha degmada Badhaadhe ee gobolka Jubbada Hoose, Xasan Nuur Cabdi, ayaa faahfaahin ka bixiyay khasaaraha Al-Shabaab lagu gaarsiiyay dagaalladii ka dhacay magaalada Kudhaa iyo nawaaxigeeda.
Guddoomiyaha ayaa sheegay in tirada xubnaha Al-Shabaab ee lagu dilay Jasiiradda Kudhaa iyo deegaannada ku xeeran ay kor u dhaaftay laba boqol, isagoo xusay in sidoo kale nolosha lagu qabtay sideed xubnood oo ka tirsan kooxda.
“Nimankaasi sidaad ogtihiinba weerar bay nagu soo sameeyeen, waan iska caabinay, dib ayaana u celinay. Dhimashadooda hadda waxay mareysaa 250. Weli waxyaabo kale oo la soo qaadayo way jiraan, balse inta aan xaqiijinay waa 250,” ayuu yiri Guddoomiyaha degmada Badhaadhe, Xasan Nuur Cabdi.
Wuxuu intaas ku daray inuu indhihiisa ku arkay sideed ka mid ah gaadiidka dagaalka ee Al-Shabaab looga burburiyay dagaalka ka dhacay Kudhaa iyo nawaaxigeeda.
“Runtii khasaare aysan ka soo kaban doonin ayaa halkaas kasoo gaaray Khawaarijta, mana u maleynayo inay mar kale kusoo laaban doonaan deegaannada Jubbaland,” ayuu sii raaciyay.
Ugu dambeyntii, Guddoomiyaha ayaa sheegay in ciidamada ay weli ku daba jiraan firxadka Al-Shabaab, isla markaana xaaladda Kudhaa ay haatan degan tahay, iyadoo dadkii ku barakacay dagaalka ay bilaabeen inay dib ugu soo laabtaan guryahooda.
