Wararka24: 24-01-2026 Dowladda Ukraine ayaa si kulul u cambaareysay duqeymo cusub oo ay Ruushku habeen hore ku qaaday mid ka mid ah magaalooyinka Ukraine, kuwaas oo ku soo beegmay xili ay dib u billowdeen wada-hadalada nabadeed ee ay Mareykanka iyo Ruushku ka wadaan magaalada Abu Dhabi, taas oo looga gol leeyahay in lagu soo afjaro colaadda socota muddo ku dhow afarta sano.
Wasaaradda Arrimaha Dibadda ee Ukraine ayaa sheegtay in weerarkaas uu dhacay xilli dib loo dajinayay wadahadalada, isaga oo saameyn ballaaran ku yeeshay dadka rayidka ah iyo miiskii nabadeed ee la isku dayayey in la furo.
Duqeymaha ayaa lala beegsaday magaalooyinka Kyiv iyo Kharkiv, iyadoo mas’uuliyiinta Ukraine ay sheegeen in ugu yaraan hal qof ku dhintay ayna ku dhaawacmeen tobanaan kale, ayna qaraxyo burburiyeen kaabayaal muhiim u ahaa nolosha shacabka oo ay ku jiraan dhismayaal shacab iyo adeegyo bulsho.
Vitali Klitschko, ayaa sheegay in weerarka uu saameyn ku yeeshay dhismayaal badan, sidaa darteed kumanaan qof ayaa lagu soo warramayaa inay bilaa kuleyl ahaayeen xilli cimiladu aad u qabow tahay.
Wasiirka Arrimaha Dibadda Ukraine, Andrii Sybiha, ayaa ku tilmaamay weerarka “mid naxariis darro ah” oo uusan ahayn kaliya weerar ku wajahan dadkiisa, balse sidoo kale ku dhacay miiska wadahadalada nabadeed iyada oo rajadii nabadeed ee laga qabay kulanka ay sii fogaatay.
Wada-hadalladaasi ayaa ah kuwa diyaar u ah maalmo kale, iyadoo ergayada Mareykanka, Ukraine iyo Ruushkaba ay ka qeyb galayaan kulamo si toos ah loogu doonayo in lagu gaaro heshiis nabadeed, inkastoo arrimaha dhuleed ee muranku ku salaysan yahay ay weli u muuqdaan caqabado adag.
