Muqdisho – Wararka24: Waxaa sii kordhay doodda ku saabsan warar baraha bulshada ku faafay oo sheegaya in ilaa 60 basaasiin shisheeye ah ay si degdeg ah uga baxeen gudaha Soomaaliya, kaddib markii la jabsaday nidaamka dal-ku-galka elektarooniga ah (e-Visa).
Baaritaan Wararka24 ay ku sameysay arrintan, oo ay la xiriirtay ilo amni iyo diblomaasiyiin xog-ogaal u ah, ayaa muujinaya in sheegashadaasi aanay heyn wax caddeyn ah, islamarkaana u muuqato war been abuur ah oo si fudud loogu faafiyay internet-ka.
Waxaa la xaqiijiyay in nidaamka e-Visa Soomaaliya uu soo wajahay jab amni oo farsamo, taas oo keeni karta in xogta qaar ka mid ah codsadayaasha ay banaanka u soo baxday.
Dowlado shisheeye ayaa xitaa muwaadiniintooda kula taliyay taxaddar intii dhibaatada farsamo la xallinayo.
Si kastaba, ma jiro ilo dowladeed ama hay’ad amni oo xaqiijisay sheegashada ah in tiro si gaar ah u cayiman oo ah basaasiin shisheeye ay hal mar dalka uga baxeen 24 saac gudahood.
Sarkaal sare oo katirsan hay’ad amni oo aan magaciisa la shaacin ayaa sheegay
Xitaa annaga oo hay’ad amni ah ma hayno liis rasmi ah oo lagu tirin karo inta sirdoon shisheeye oo dalka jooga.
Sidaas darteed, waa wax aan macquul aheyn in la sheegto inay 60 basaas hal maalin wadareed uga baxeen dalka.”
Wararka ku saabsan in 60 basaas shisheeye ay ka carareen Soomaaliya waxay u muuqdaan kuwo lagu faafiyay si aan sal lahayn oo qeyb ka noqday buuqa ka dhashay jabsiga nidaamka e-Visa.
Inkastoo arrintaas lafteedu tahay mid muhiim u baahan baaritaan amni, haddana ma jiro caddeyn muujinaysa in sirdoon tiro intaa le’eg uu si degdeg ah dalka uga baxay.
Wararka24 waxaan sii wadi doonaa dabagalka arrintan, wuxuuna la socon doonaa warbixinada rasmiga ah ee kasoo baxa hay’adaha amniga iyo Wasaaradda Arrimaha Dibadda.
