Hargeysa – Wararka24: Xukuumadda Somaliland ayaa maanta soo saartay war rasmi ah oo ka kooban afar qodob oo muhiim ah oo la xiriira arrimaha hawada sare, nidaamka eVisa iyo maamulka duulimaadyada gudaha xuduudaha Somaliland. Qodobadan ayaa jawaab u ah tallaabooyinka ay dowladda Soomaaliya dhowaan qaaday ee ku saabsan nidaamka dal-ku-galka elektarooniga ah (eVisa).
Maamulka iyo Bad-qabka Hawada (Airspace Sovereignty and Safety)
Xukuumadda Somaliland ayaa ku adkaysatay in ay iyadu leedahay maamulka buuxa ee hawada, dhulka iyo badda ku jirta xuduudaheeda, iyadoo sheegtay in oggolaanshaha isticmaalka hawada sare laga heli karo oo keliya Wasaaradda Duulista Hawada iyo Horumarinta Madaaradaha Somaliland.
Warsaxaafadeedka ayaa lagu sheegay in arrintan ay waafaqsan tahay shuruucda duulimaadyada ee qaranka iyo kuwa caalamiga ah.
E-Visa iyo Shuruucda Socdaalka (Disapproval of Somalia’s Unlawful eVisa)
Somaliland ayaa sheegtay in nidaamka dal-ku-galka ee eVisa ee ay dhowaan soo saartay Soomaaliya uusan khusaynin gudaha Somaliland, isla markaana aan lagu soo geli karin dhulkeeda.
Waxaa lagu caddeeyay in Somaliland leedahay nidaam u gaar ah oo socdaalka ah, halka dal-ku-galka loogu oggol yahay nidaamka Visa on Arrival oo laga heli karo Garoomada Hargeysa iyo Berbera.
Shuruucda Duulimaadyada Hawada Sare (Regulation of Flights within Somaliland Airspace)
Laga bilaabo 10-ka November 2025, dhammaan diyaaradaha isticmaala hawada Somaliland waa inay helaan oggolaansho rasmi ah oo ka yimid Wasaaradda Duulista Hawada.
Diyaarad aan haysan ruqsad Somaliland kama duuli karto ama kama mari karto hawadeeda, waxaana tallaabo sharci ah laga qaadi doonaa cid kasta oo jebisa nidaamkaas, sida lagu sheegay warsaxaafadeedka.
Baaqa Beesha Caalamka (International Appeal)
Xukuumadda Somaliland ayaa ugu baaqday hay’adaha caalamiga ah sida ICAO, IATA, iyo Qaramada Midoobay, inay si dhab ah uga jawaabaan khatarta ka dhalan karta is-maandhaafka maamulka hawada ee u dhexeeya Somaliland iyo Soomaaliya.
Somaliland ayaa sheegtay in tallaabooyinka Soomaaliya ay halis ku yihiin bad-qabka diyaaradaha rayidka ah, ayna siyaasadaysay maamulka hawada si ay cadaadis ugu saarto shacabka iyo dowladda Somaliland.
Somaliland waxay beesha caalamka ka codsatay in la:
1. Hubiyo dhex-dhexaadnimada maamulka hawada, isla markaana laga saaro khaladka ku jira system-ka Timatic ee IATA, kaas oo si qalad ah madaarada Somaliland ugu calaamadiyay inay ka tirsan yihiin Soomaaliya.
2. Abuuro xal sharci ah oo lagu maareyn karo khilaafka maamulka hawada, maadaama Somaliland sheegtay inay u madax-bannaan tahay dhulkeeda, baddeeda iyo hawadeeda.
3. La sameeyo hab-raac daah-furan oo lagu maamulo dhaqaalaha hawada Somaliland/Soomaaliya, kaas oo haatan gacanta ugu jira dowladda federaalka Soomaaliya.
4. ICAO ay samayso qiimayn madaxbannaan oo lagu eegayo maamulka duulimaadyada Somaliland iyo in la sameeyo nidaam toos ah oo lagu maamulo duulimaadyada rayidka ah ee dalka.
Warsaxaafadeedkan ayaa imaanaya xilli ay Somaliland si adag uga falcelisay nidaamka eVisa ee ay Soomaaliya ku soo rogtay dadka u socda Hargeysa, taas oo ay ku tilmaantay tallaabo sharci darro ah oo lagu xadgudbay madax-bannaanideeda hawada.
