Beledweyne – Wararka ka imaanaya gobolka Hiiraan ayaa sheegaya in ciidanka deegaanka ee Macawiisleeyda ay xalay weerar culus ku qaadeen fariisimo ay kooxda Al-Shabaab ku lahaayeen deegaanka Goobo, oo hoostaga degmada Maxaas ee bartamaha Soomaaliya.
Dadka deegaanka ayaa sheegay in dagaalka uu dhacay habeenkii Axadda, isla markaana uu socday muddo saacado ah.
Ciidamada Macawiisleeyda ayaa weerarka ka qaaday dhowr jiho, iyaga oo la sheegay inay khasaare culus gaarsiiyeen kooxda Al-Shabaab.
Saraakiil amni ayaa sheegay in la isticmaalay hubka noocyadiisa kala duwan, halka dagaalyahanno badan oo ka tirsan Al-Shabaab ay halkaas kaga baxsadeen, inkastoo aan weli si rasmi ah loo xaqiijin khasaaraha dhimasho iyo dhaawac.
Weerarkan ayaa qayb ka ah howlgallada ay ciidamada deegaanka ee Macawiisleeyda ka wadaan gobolka Hiiraan, kuwaas oo lagu doonayo in lagu wiiqo awoodda Al-Shabaab iyo saldhigyadooda ku yaalla deegaannada istaraatiijiga ah.
Deegaanka Goobo ayaa muhiim u ah isku xirka gobollada Hiiraan iyo Galguduud, waxaana saraakiisha amnigu sheegeen in howlgalka lagu doonayo in lagu xoojiyo ammaanka iyo dhaq-dhaqaaqa ciidamada dowladda iyo kuwa deegaanka ee ka dagaallamaya halkaas.
