Riyaad – Boqortooyada Sucuudiga ayaa si rasmi ah u magacowday Dr. Sheekh Saalax Cabdillaahi Al-Fowsaan inuu noqdo Muftiga guud ee dalka, kaddib geeridii dhowaan ku timid muftigii hore, Sheekh Cabdicasiis Aala Sheekh.
Sheekh Saalax Al-Fowsaan, oo ka mid ah culimada ugu waaweyn ee Golaha Sare ee Culimada Sucuudiga, ayaa caan ku ahaa fatwooyin iyo muxaadarooyin si weyn looga dhageysto gudaha iyo dibadda Sucuudiga. Magacaabistiisa ayaa timid kaddib wareegto boqortooyo oo uu saxiixay Boqor Salmaan bin Cabdicasiis Al-Sacuud.
Mansabka Muftiga guud ayaa ka mid ah jagooyinka ugu sarreeya ee diimeed ee dalka Sucuudiga, waxaana uu door weyn ka qaataa soo saarista fatwooyinka, hagidda arrimaha diinta, iyo talo-bixinta ku saabsan shuruucda iyo anshaxa Islaamka.
Sheekh Al-Fowsaan ayaa muddo dheer ahaa macallin sare oo ka tirsan Jaamacadda Imaam Maxamed bin Sucuud ee magaalada Riyaad, wuxuuna ka mid ahaa xubnaha ruug-caddaaga ah ee saameyn ballaaran ku leh go’aamada diimeed ee dalka.
Magacaabista cusub ayaa si ballaaran loogu soo dhaweeyay gudaha Sucuudiga, iyadoo culimada iyo aqoonyahannadu ay sheegeen in Sheekh Al-Fowsaan uu leeyahay aqoon iyo waayo-aragnimo diimeed oo qoto dheer, taas oo sii xoojin doonta doorka uu dalka Sucuudiga ku leeyahay dunida Islaamka.
