Addis Ababa – Ra’iisul Wasaarihii hore ee Soomaaliya, Dr. Cabdiweli Maxamed Cali Gaas, ayaa si rasmi ah ula wareegay xilka Ergeyga Gaarka ah iyo Madaxa Howlgalka Midowga Afrika u qaabilsan Koonfurta Suudaan, kadib munaasabad ka dhacday xarunta Midowga Afrika ee magaalada Addis Ababa.
Guddoomiyaha Guddiga Midowga Afrika, Mahmoud Ali Youssouf, ayaa Dr. Gaas ku soo dhaweeyay xilkan, isagoo sheegay in magacaabistiisu ay muujinayso kalsoonida uu ururku ku qabo khibraddiisa hoggaamineed iyo fahamka uu u leeyahay xaaladaha siyaasadeed ee gobolka kajira.
Dr. Cabdiweli Gaas ayaa lagu ammaanay dadaalkiisii hore ee dhanka nabad-dhisidda iyo dib-u-heshiisiinta, iyadoo xilkan cusub ee loo dhibay looga fadhiyo inuu hoggaamiyo qorshayaasha Midowga Afrika ee ku aaddan xasillinta iyo wada-hadalka siyaasadeed ee Koonfurta Suudaan.
Xilka cusub ee uu qabtay Dr. Gaas ayaa la sheegay inuu yahay mid muhiim ah oo ka mid ah jagooyinka ugu sarreeya ee qof Soomaali ah uu ka hayo hay’adaha caalamiga ah, waxaana lagu tilmaamay tallaabo muujinaysa doorka sii kordhaya ee Soomaaliya ku leedahay arrimaha gobolka iyo Afrika guud ahaan.
Magacaabista ayaa timid iyadoo Koonfurta Suudaan ay weli wajahayo xaalad adag oo dhinaca amniga iyo siyaasadda ah, halka dadaallada dib-u-heshiisiinta ee Midowga Afrika ay weli socdaan si loo helo xal waara oo dalkaas ka hirgala.
Dr. Cabdiweli Maxamed Cali Gaas ayaa hore u soo noqday Ra’iisul Wasaaraha soomalia iyo Madaxwaynaha maamulka Puntland, wuxuuna ka mid yahay aqoonyahannada Soomaaliyeed ee door muuqda ka ciyaaray arrimaha dowlad-dhiska iyo horumarinta siyaasadda gobolka.
