Madaxweynaha Puntland, Siciid Cabdullaahi Deni, ayaa magaalada Boosaaso kulan dheer kula yeeshay Isimmada dhaqanka iyo siyaasiyiinta ka soo jeeda gobollada Sanaag, Haylaan iyo Bari. Kulanka oo uu sidoo kale goob joog ka ahaa Guddoomiyaha Baarlamaanka Puntland, Cabdirisaaq Siciid Yuusuf, ayaa diiradda lagu saaray arrimaha siyaasadda, saami-qaybsiga iyo difaaca deegaannada.
Madaxweyne Deni ayaa sheegay inuu ballaarin doono saamiga siyaasadeed ee gobolladaasi, isagoo ku daraya xilalka wasiirrada, agaasimayaasha, hay’adaha kala duwan, ciidamada iyo shaqaalaha dawladda. Isimmada iyo siyaasiyiinta ayaa dhankooda soo dhoweeyay ballanqaadka, iyagoo xusay in loo baahan yahay in si dhab ah loo hirgeliyo si loo helo isku dheelitirnaan siyaasadeed oo ka tarjumaysa danaha gobollada Sanaag, Haylaan iyo Bari.
