Dowladda Jabuuti ayaa bilowday olole rasmi ah oo lagu saarayo dadka ajaanibta ah ee aan haysan dukumentiyo sharci ah, kuwaas oo u badan dad kasoo jeeda Soomaaliya, Itoobiya iyo Yemen. Tallaabadan ayaa timid iyadoo xukuumaddu ay sheegtay in ay doonayso in la adkeeyo ammaanka iyo kala dambeynta gudaha dalka.
Howlgallada socda ayaa lagu beegsanayaa dadka ku nool xaafadaha la dego si aan rasmi ahayn, iyadoo dad badan la xiray isla markaana la qorsheynayo in si toos ah dib loogu celiyo dalalkooda. Ilo-wareedyo ayaa sheegaya in dadkaasi ay isugu jiraan muhaajiriin iyo qaxooti kasoo cararay dagaallo iyo dhibaatooyin dhaqaale.
Dowladda Jabuuti ayaa muddo dheer ahayd meel ay dad badan u arkaan marin ama meel nabdoon oo ay ku sii nagaadaan. Waxaa ku sugan qaxooti badan oo ka yimid Soomaaliya iyo Yemen, halkaas oo colaaduhu wali ka jiraan. Dadka la qabtay ayaa la sheegay in aysan haysan waraaqo sharciyeed oo ogolaanaya inay dalka ku joogaan ama ka shaqeeyaan.
Hay’adaha samafalka iyo xuquuqul in saanka ayaa walaac ka muujiyay tallaabada dowladda Jabuuti, iyagoo sheegaya in dib u celinta dadkaas gaar ahaan haweenka, carruurta, iyo dadka nugul ay sababi karto halis nololeed iyo tacaddiyo ka dhaca meelaha ay dib ugu laabanayaan.
Waxaa la filayaa in ololahaasi uu socdo maalmo kale, iyadoo dadka Soomaaliyeed ee ku sugan Jabuuti lagu wargeliyay in ay hubiyaan sharcigooda ama ay la xiriiraan hay’adaha ka shaqeeya arrimaha qaxootiga si ay uga badbaadaan tallaabooyinka socda.
