Madaxweynaha Maamulka Somaliland, C/raxmaan Maxamed C/llaahi (Cirro), ayaa khudbad uu ka jeediyay xuska 18-ka May ee maalinta Qaranimada Somaliland, wuxuu kaga hadlay aragtidiisa ku aadan gooni isu taagga deegaanka iyo xiriirka uu la leeyahay Soomaaliya inteeda kale.
Cirro, waxa uu caddeeyey in Somaliland ay weli ku adkaysanayso inay noqoto dal madax-bannaan, balse ay diyaar u yihiin inay furto xal u helidda caqabadaha siyaasadeed iyo kuwa amni ee ka taagan Soomaaliya.
Waxaan aaminsanahay in Jamhuuriyadda Soomaliland oo ah qaran madax-bannaan inay door muhiim ah ka qaadan karto xal u helidda mushkiladaha ka taagan Soomaaliya,” ayuu yidhi Madaxweyne Cirro, isagoo hoosta ka xarriiqay in madaxbannaanidu aanay Somaliland ka hor istaagin inay door ku yeelato nabadda gobolka.
Sidoo kale, Madaxweynaha ayaa xusay in Soomaliland ay buuxisay dhammaan shuruudaha looga baahnaa dal madaxbannaan, isla markaana ay u gudbisay codsiyo rasmi ah dalal badan oo caalamka ah si loo aqoonsado qaranimadeeda.
Maanta Jamhuuriyadda Soomaliland waxa ay buuxisay halbeeg kasta oo laga filayo Qaran madax-bannaan,” ayuu yiri Cirro, isagoo muujiyay rajo laga qabo in beesha caalamku ay aqoonsi buuxa siiso maamulkaasi.
Hadalkan ayaa imaanaya iyadoo weli aysan jirin aqoonsi rasmi ah oo caalami ah oo Somaliland ka hesho dalalka dunida, inkasta oo ay si madaxbannaan u maamulaan dhulkooda tan iyo 1991-kii.
