Maamulka Puntland ayaa si kulul uga falceliyay hadallo dhowaan kasoo yeeray hoggaamiyaha SSC-Khaatumo, Cabdiqaadir Firdhiye, kuwaasoo la sheegay inay ku saabsan yihiin qorshe lagu doonayo in gobolka Sanaag lagu daro maamulka SSC-Khaatumo. Puntland ayaa arrintan u aragta mid khatar ku ah jiritaankeeda iyo isku haynta dhulkeeda.
Wasiirka Warfaafinta Puntland Maxamuud Caydiid Dirir oo ka hadlay kulan maanta ka dhacay magaalada Garoowe ayaa sheegay in fikirkan laga soo abaabulay magaalada Muqdisho, isla markaana uu yahay mid weerar toos ah ku ah Puntland.
“Qorshaha lagu darayo Sanaag ee uu wado Firdhiye, waa mid aan marnaba aqbali doonin. Puntland kama oggolaaneyso in gobol kamid ah laga gooyo iyadoo aan wadatashi laga samayn,” ayuu yiri Wasiir Caydiid.
Wuxuu intaas ku daray in hoggaamiyaha SSC laga rabo inuu dib uga laabto hadalladiisa, isla markaana uu si cad uga raalli geliyo shacabka reer Puntland. Wasiirku wuxuu tilmaamay in siyaasadda Puntland ay ku dhisan tahay wadatashi iyo midnimo, ayna suurtagal ahayn in go’aanno masiiri ah si hal dhinac ah loo gaaro.
Wasiir Caydiid wuxuu sidoo kale ku eedeeyay hoggaamiyaha SSC inuu qayb ka yahay qorshe ballaaran oo lagu wiiqayo awoodda maamullada Puntland iyo Jubbaland, isagoo taageero ka helaya Dowladda Federaalka. Wuxuu sheegay in arrintani ay muujinayso dano gaar ah oo aan dan u ahayn shacabka deegaannadaasi.
Khilaafka u dhexeeya Puntland iyo SSC-Khaatumo ayaa u muuqda mid sii xoogeysanaya, gaar ahaan tan iyo markii Firdhiye uu ka qeyb galay shir ay Puntland si rasmi ah uga baxday, taas oo sii hurisay xiisadda siyaasadeed ee labada dhinac.